11.08.2023, 08:35 278
- Azərbaycan Respublikasının Kəlbəcər rayonunun kənd inzibati ərazi dairəsində olan Abdullauşağı kəndi Mozçayın sol sahilində, dağ ətəyində yerləşir. Keçmiş adı Şahsevənlidir. Yerli əhalinin məlumatına görə, XIX əsrin sonlarında Ağcabədi rayonunun Şahseven kəndindən köçmüş Abdulla adlı şəxs ərazidə iki binə salmışdır. XX əsrin əvvəllərində də Cavanşir qəzasında Böyük və Kiçik Abdullauşağı adlı iki binə adı qeydə alınmışdır. Rayonun Çobangərəkməz kəndi yaxınlığında bir yurd yerində də Abdulla yurdu adlanır.
Digər bir yerli məlumata görə, Abdullauşağı kəndi Abdulla adlı şəxsin adı ilə bağlıdır. Abdullauşağı, yəni Abdulla kişinin nəslindən olanlar və ya Abdulla kişinin uşaqları yaşayan kənd kimi nəzərdə tutulur.
Abdullauşağı kəndinin əhalisinin əsas məşğuliyyətini kənd təsərrüfatı-əkinçilik, maldarlıq və heyvandarlıq təşkil etmişdir.
Kənd 1993-cü ildə Ermənistan Silahlı Qüvvələri tərəfindən işğal edilmişdir. 10 noyabr 2020-ci ildə Azərbaycan, Rusiya və Ermənistan dövlət başçılarının imzaladığı üçtərəfli bəyənatdan sonra Abdullauşağı kəndi 25 noyabr 2020-ci ildə işğaldan azad edilib.
Tahirə AĞAMİRZƏ
