09.10.2025, 17:43 115
- "Qarabağın işğaldan azad edilmiş ərazilərindən bu günə qədər Məhkəmə Tibbi Ekspertiza və Patoloji Anatomiya Birliyinə təxminən 800 nəfərə məxsus sümük qalıqları qəbul edilib".
"Vətən səsi" xəbər verir ki, bunu Məhkəmə-Tibbi ekspertiza və patoloji anatomiya bölməsinin direktoru Ədalət Həsənov “İtkin düşmüş şəxslər probleminin həlli üçün səylərin birləşdirilməsi və əməkdaşlığın genişləndirilməsi” mövzusunda keçirilən beynəlxalq konfransda çıxışı zamanı deyib. Onun sözlərinə görə, cəsədi tapılmış 187 nəfərin qalıqları Dövlət Komissiyasının tövsiyəsi ilə ailələrinə təhvil verilib: "Bəzən kanalizasiya sularının axıdıldığı yerlərə bilərəkdən yandırılmış şəxslərin qalıqları basdırılır ki, bu, onların şəxsiyyətinin müəyyənləşdiriıməsini çətinləşdirir. Əsas problemlər kütləvi məzarlıqlarla bağlıdır. Nə qədər qəribə səslənsə də, bəzən kütləvi məzarlıqda aşkarlanan bir şəxsin qalıqlarının bir hissəsi həmin məzarlıqdan kilometrlərlə aralıda yerləşdirilən başqa kütləvi məzarlıqda aşkarlanır. Bu, bəlkə, məzarlıqların bir yerdən başqa yerə daşınması, bəlkə də, başqa bir səbəbdən baş verib".
