04.07.2023, 11:27 309
- İşğaldan azad olunmuş ərazilərimizə Böyük Qayıdış proqramı üzrə görülən işlər çərçivəsində Tərtər rayonunun Talış kəndində sakinlərin məşğulluğunun təminatı diqqət mərkəzindədir. Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyi tərəfindən kənd sakinləri özünüməşğulluq proqramına cəlb edilib. Verilmiş aktivlər hesabına 7 nəfər maldarlıq, 1 nəfər arıçılıq üzrə təsərrüfatlarını yaradıblar. Daha bir kənd sakini isə qəssablıq fəaliyyət istiqamətləri üzrə aktivlərlə təmin edilib. Ümumilikdə kənd sakinlərindən 44 nəfər agentlik tərəfindən aktiv məşğulluq proqramları ilə əhatə olunub.
Kənd sakini Əyyub Əkbərov arıçılığın maraqlı sahə olduğunu qeyd edərək, təsərrüfatı genişləndirməyi qarşıya məqsəd qoyduqlarını bildirib. “Dövlət Məşğulluq Agentliyi tərəfindən bizə 20 arı ailəsi verilib. Talış kəndinin təbiəti arıçılığın inkişafı üçün əlverişlidir. Kənd ərazisində müxtəlif balverən bitkilər çoxluq təşkil edir. Hazırda arılar işləyir, təbiətdən nektar toplayırlar. İnanırıq ki, arıçılıqdan yaxşı nəticələr əldə edəcəyik. Fikrimiz təsərrüfatı genişləndirməkdir” – deyə, Talış sakini bildirib. (AZƏRTAC)
