24.11.2025, 13:45 222
- Xocəvənd rayonunun Tuğ qəsəbəsində məktəb, uşaq bağçası və istilik qazanxanasının yerləşdiyi binalarının təmir-bərpa, kommunikasiya, habelə ərazidə yaşıllıq və abadlıq işləri ilə bağlı layihənin icrasına başlanır.
"Vətən səsi" xəbər verir ki, Ağdam, Füzuli və Xocavənd Rayonlarında Bərpa,Tikinti və İdarəetmə Xidməti publik hüquqi şəxs bununla bağlı daha bir tender müsabiqəsi elan edib. Müsabiqənin şərtlərinə görə, iddiaçılar öz təkliflərini müvafiq sənədlərlə birlikdə dekabrın 19-dək təqdim etməlidir. Layihə üzrə həmin qeyri-yaşayış binalarının bərpası, kommunikasiya sistemləri ilə təchizat, ərazidə yaşıllıq və abadlıq işlərinin görülməsinə ümumilikdə 3 milyon 225 min 963 manat ayrılması nəzərdə tutulur.
Xatırladaq ki, hazırda Xocavənd rayonunun bir sıra kəndlərində, o cümlədən Tuğda evlərin bərpa və yenidənqurma işləri davam edir. Prezident İlham Əliyevin iki il əvvəl imzaladığı sərəncamla Tarixi-Memarlıq və Təbiət Qoruğu elan edilən Tuğ kəndində yaşayış evləri ilə yanaşı qədim tikililərin və memarlıq üslubu ilə diqqəti çəkən abidələrin bərpasına xüsusi diqqət yetiriləcək. Bununla bağlı layihələrin icrasına Ağdam, Füzuli və Xocavənd Rayonlarında Bərpa,Tikinti və İdarəetmə Xidməti nəzarət edəcək.
Elxan SALAHOV
