• Milli Məclisin dünən keçirilən plenar iclasında "Yolumuz Qarabağadır" portalı vasitəsilə vətəndaşların Kəlbəcərə gediş-gəlişinə icazə verilməsi məsələsi də diqqət mərkəzində olub.

"Vətən səsi" xəbər verir ki, 123 saylı Kəlbəcər Seçki Dairəsindən deputat Mircəlil Qasımlının parlamentdə kəlbəcərlilərlə bağlı qaldırdığı bu məsələ sosial şəbəkələrin trendinə çevrilib. Parlamentin plenar iclaslarının birində 1993-cü ildə Kəlbəcərin işğalı Ağdaban kəndinin müdafiəsi uğrunda qəhrəmancasına şəhid olmuş Ülfət Kərimoğlu Milli Qəhrəman adının verilməsi ilə rayon sakinlərinin xahişini Milli Məclisin tribunasından səsləndirdiyi xatırladan deputat bu məsələnin hələ də öz həllini tapmadığını dilə gətirib: "Təəssüflər olsun ki, məsələ ilə əlaqədar müvafiq addımlar atılsa da, konkret olaraq, nəticə əldə edilməyib. Kəlbəcər camaatı şəxsi məsələlərdən çox dövlət maraqlarına, ümummilli xarakter daşıyan mövzulara toxunaraq daha çox müraciətlər ünvanlayıblar".

Deputat Kəlbəcərin işğalı zamanı girov düşməmək üçün son anda özünü körpüdən çaya ataraq şəhid olan rayon sakini Zərnişan Camalovanın da xatirəsinin əbədiləşdirilməsi ilə bağlı seçicilərin xahişini aidiyyəti qurumlara çatdırıb.

"Bu gün üçrəngli bayrağımızın Qarabağda dalğalanması həm şəhidlərimizin qanı, həm də cənab prezidentin uzunillər ərzində düşünülmüş, ardıcıl və strateji şəkildə həyata keçirdiyi siyasətin bəhrəsidir. Ümummilli lider Heydər Əliyev hələ 90-cı illərdə kəlbəcərlilərlə görüşəndə torpaqlarımız azad edildikdən sonra Qamışlı körpüsü yaxınlığında Zərnişan xanımın xatirəsinə abidə ucaldılmasının təmin ediləcəyini vurğulamışdı. Bu istəyin reallaşması Kəlbəcər əhalisi üçün böyük mənəvi əhəmiyyət daşıyır. Həmçinin tank komandiri, şəhid Natiq Məlikova Milli Qəhrəman adının verilməsi barədə çoxsaylı müraciətlər var. Natiq Məlikovun son döyüşü Kəlbəcərdə, Bağlıpəyə istiqamətində olmuşdu. O, çox böyük qəhrəmanlıq nümayiş etdirmişdi. Bu məsələnin müvafiq qurumlarda yenidən nəzərdən keçirilməsi xahiş olunur", - deyə deputat qeyd edib.

Mircəlil Qasımov "Yolumuz Qarabağadır" portalı vasitəsilə rayon sakinlərinin Kəlbəcərə gediş-gəlişinin təmin olunması məsələsini xüsusi vurğulayıb. O, bu problemin təkcə rayon sakinlərinin xahişi yox, həm də müzakirəyə ehtiyacı olan məsələ kimi qabardıb:  "Bilirsiniz ki, işğaldan azad olunmuş ərazilərdə portal vasitəsilə gediş-gəlişdə aktivlik müşahidə olunur. Təəssüf ki, portal üzərindən xüsusi icazə indiyədək Kəlbəcər rayonuna tətbiq olunmayıb. Əlbəttə, minalanmış ərazilərin mövcudluğu nəzərə alınmalıdır. Lakin eyni zamanda yaşlı nəslin nümayəndələrinin, sağlamlıq problemi olan insanların öz yurd-yuvasını görmək istədikləri də arzuolunandır. Bu məsələ də balanslı şəkildə həll olunmalıdır".

Mircəlil Qasımov 2026-cı il üçün Milli Məclisə təqdim olunmuş dövlət büdcəsi layihəsi barədə fikirlərini də açıqlayıb. O, qeyd edib ki, büdcə layihəsi reallıqlara uyğun şəkildə formalaşdırılıb: "Büdcədə müdafiə və təhlükəsizlik məsələri ilə yanaşı işğaldan azad olunmuş ərazilərin bərpası və Kəlbəcər də daxil olmaqla regionların sürətli inkişafı üçün nəzərdə tutulan xərclərin olması təqdirəlayiqdir. Bu baxımdan 2026-cı il dövlət büdcəsi strateji inkişaf prioritetləri ilə üst-üstə düşür və ölkəmizin iqtisadi dayanıqlığının möhkəmləndirilməsinə xidmət edir".

Elxan SALAHOV