• “Azərbaycan Rusiya sülhməramlılarının qalma müddətinin uzadılması ilə razılaşmır, yaxud nəzəri olaraq, Rusiya qalmaq istəmir, yaxud qalmaq imkanı yoxdur, onda Rusiya BMT Təhlükəsizlik Şurasının üzvü kimi BMT-yə müraciət etməli və bəyan etməlidir ki, “Dağlıq Qarabağda insanların məhv edilməsi təhlükəsi olduğundan və bunu qeydə aldığımızdan, biz vaxtilə sülhməramlı kontingent gətirmək qərarına gəldik, lakin indi biz öz birləşmələrimizi çıxarırıq, təhlükə aradan qalxmadığı üçün, deməli, buraya BMT mandatı ilə beynəlxalq sülhməramlı qüvvələr yerləşdirilməlidir”. Yalnız Rusiya bəyan edə bilər ki, münaqişə həll olunub, insanlar üçün təhlükə yoxdur və ona görə də Rusiya sülhməramlılarını geri çəkir, əks halda Rusiya geri çəkilsə, beynəlxalq sülhməramlı qüvvələr gələcək”.

Ermənistanın “Baqramyan 26” Telegram kanalının məlumatına görə, baş nazir Nikol Paşinyan belə sərsəm açıqlama ilə çıxış edib. Ümumiyyətlə, Azərbaycan öz tarixi ərazilərini işğaldan azad etdikdən sonra Qarabağın dağlıq hissəsində hələ də qalmaqda olan ermənilər üçün guya təhlükə yarandığı barədə Paşinyan və komandası əsasız iddia səsləndirib, dünya ictimaiyyətinin diqqətini yanlış istiqamətə yönəltməyə cəhd göstərir. Azərbaycan rəhbərliyi dəfələrlə bəyan edib ki, ölkə ərazisində yaşayan bütün millətlərin nümayəndələri kimi ermənilərin də bütün vətəndaş hüquqları təmin olunacaqdır.  Azərbaycan xalqına və dövlətçiliyinə qarşı cinayətlərdə iştirak etməmiş ermənilər müstəqil ölkəmizin vətəndaşları kimi yaşamaq istəsələr, onları heç bir təhlükə gözləmir.

Rusiya sülhməramlılarının bölgədə qalıb-qalmamasına gəldikdə isə, bu məsələ 9/10 noyabr 2020-ci il tarixli üçtərəfli Bəyanta birmənalı şəkildə dəqiq göstərilib:  “Rusiya Federasiyasının sülhməramlı kontingentinin qalma müddəti 5 ildir və müddətin bitməsinə 6 ay qalmış hazırkı müddəanın tətbiqinə xitam verilməsi niyyətini Tərəflərdən hər hansı biri bəyan etməzsə, avtomatik olaraq növbəti 5 illik müddətlərə uzadılır”.

Xalqımızın məşhur aforizmində deyildiyi kimi, “Paşinyan özünə gülür”, həmin müddəanın tətbiqinə xitam verilməsi hüququ, öz ərazisində təhlükəsizliyi təmin etmək vəzifəsi Azərbaycana məxsusdur.