28.11.2025, 16:29 220
- Azərbaycanın uzun illər davam edən tələblərindən biri artıq reallaşmaq üzrədir. ATƏT-in Minsk Qrupunun dekabrın 1-də fəaliyyətini tamamilə dayandıracağı açıqlanıb. Bu addım yalnız təşkilatın fəaliyyətinə deyil, eyni zamanda keçmiş Dağlıq Qarabağ münaqişəsinin rəsmi simvollarından birinə də nöqtə qoyur.
Siyasi şərhçi Turan Rzayevin fikrincə, Minsk Qrupunun bağlanması siyasi baxımdan ciddi dəyişiklik yaratmasa da, prosesin mahiyyətcə artıq ikitərəfli danışıqlar üzərində formalaşdığını göstərir. O qeyd edib ki, bu qurum illər boyunca münaqişənin həllinə real töhfə verə bilməyib, son illərdə isə tamamilə passiv mövqe tutub:
"Hazırda Azərbaycan və Ermənistan arasında sülh prosesi birbaşa dialoq əsasında inkişaf edir. Liderlərin beynəlxalq tədbirlər çərçivəsində keçirdiyi görüşlər, Vaşinqtonda sülh sazişinin paraflanması və qarşılıqlı iradə, Minsk Qrupunun artıq funksional əhəmiyyətinin qalmadığını təsdiqləyir".
T.Rzayevin fikrincə, əsas hədəf 2026-cı ildə sülh sazişinin imzalanmasıdır və bu istiqamətdə proseslər konstruktiv şəkildə irəliləyir.
Tahirə AĞAMİRZƏ
