• Uzun illər bağlı qalan Azərbaycan-Ermənistan sərhədində yeni mərhələyə start verilə bilər. Ermənistanın baş naziri Nikol Paşinyan sərhəd məntəqələrinin sadələşdiriləcəyini açıqlayıb.

“Vaşinqton razılaşmasında 5 əsas prinsib müəyyən olunub. Ərazi bütövlüyü. Dövlət suverenliyi. Qanunvericiliyə hörmət. Sərhədlərin toxunulmazlığı və qarşılıqlılıq. Bu prinsiplər çərçivəsində biz gömrük keçidlərinin sadələşdirilməsi layihəsini həyata keçirə bilərik.  Məqsəd biznes mühitinin yaxşılaşdırılması, həmçinin ixrac, idxal və tranzitin maksimum dərəcədə asanlaşdırılmasıdır. Bu addım  sərhəd prosedurlarını sürətləndirəcək və ticarəti eləcə də insanların hərəkətini asanlaşdıracaq. Sərhədin daha əlçatan və şəffaf olması regional əməkdaşlığın inkişafına töhfə verəcək”.

Sərhəd mövzusu əslində iki ölkə arasında həsss məsələlərdən biridir. Xatırladaq ki, sovet ittifaqı dövründə  Azərbaycan və Ermənistan eyni  ittifaqın tərkibində müttəfiq respublikalar idi. O dövrdə sərhəd xətti yalnız inzibati bölgü kimi mövcud idi. Faktiki keçid məntəqələri yox idi.

Ekspertlər İctimai Televiziyaya açıqlamalarında Paşinyanın planına aydınlıq gətiriblər.

“Nikol Paşinyanın prinsip etibarilə hansı məqamlara əsaslanaraq belə bir açıqlama ilə çıxış etdiyini söyləmək çox çətindir. Çünki mahiyyət üzrə Azərbaycanla Ermənistan arasında heç vaxt sərhəd-keçid məntəqələri olmayıb və ilk sərhəd-keçid məntəqəsi də məhz Azərbaycan tərəfindən  Laçın yolunda  quraşdırılıb”.

Bunu açıqlamasında Milli Məclisin deputatı Elçin Mirzəbəyli məsələyə münasibət bildirərkən deyib. O, bildirib ki, prinsip etibarilə  prosesin davamı barədə hər kəs məlumatlıdır: “Amma indiki şəraitdə kommunikasiyaların açılmasından söhbət gedirsə, təbii ki, bu bir neçə istiqamətlərdə sərhəd-keçid məntəqələrin olmasına zəmin yaradacaq. Nəticə etibarilə şübhəsiz, bütün bunlar hökumətlərarası komissiyalar tərəfindən müəyyənləşəcək”.

Ekspertlər  hesab edir ki, sərhəd məntəqələrinin sadələşdirilməsi regionda siyasi münasibətlərin yumuşalması ilə yanaşı, iqtisadi canlanmaya da yol aça bilər.

“Xüsusən Cənubi Qafqazda investisiya qoyuluşunda maraqlı olan ölkələr təbii ki, konfiquraktiv olaraq Azərbaycan-Ermənistan münasibətlərinin  formalaşması və sülhün əldə edilməsindən sonra  bütövlükdə bölgəyə daha çox sərmayə qoyuluşu həyata keçirəcəklər”.

Bu fikirləri səsləndirən Millət vəkili Vüqar Bayramov əlavə edib ki, Eyni zamanda hər iki ölkənin iqtisadiyyatına dəstək baxımından da vacib heesab olunur: “Xüsusən sərhədə yaxın ərazilərdə fəaliyyət göstərən vətəndaşlara, kənd təsərrüfatı məhsullarının satılması və ya digər xidmətlərin göstərilməsi həmin ərazilərdə məskunlaşan  sakinlərin iqtisadi gəlirlərini artıracaq”.

Nəticə etibarilə regionun gələcəyi üçün sərhədlərin dəqiqləşməsi çox  mühüm addımdır. Çünki onsuz iqtisadi əməkdaşlıq, ticarət, nəqliyyat layihələri tam işləməyəcək”.

Tahirə AĞAMİRZƏ