22.05.2025, 12:24 258
- “Qənaətimə görə, bu, sadəcə, təzyiq xarakterli addımlarıdır. Prinsip etibarilə Rusiya ilə Ermənistan arasındakı fundamental fikir ayrılıqları qalmaqdadır”.
Bu fikirləri Milli Məclisin deputatı Elçin Mirzəbəyli ARB24-ə açıqlamasında deyib.
Deputatın sözlərinə görə, Ermənistanın Qərbə inteqrasiyası və Nikol Paşinyanın 2018-ci ildən etibarən başlatdığı Qərb kursu mahiyyət etibarilə dəyişməyib: Lakin indiki reallıqları nəzərə alsaq, hal-hazırda Avropa İttifaqının Ermənistana dəstək vermək imkanlarının məhdudlaşdığını, eyni zamanda Azərbaycanın bu istiqamətdə çox uğurlu bir diplomatiya həyata keçirdiyini nəzərə alsaq, indiki şəraitdə yaranmış vəziyyətdən Ermənistanın və təbii ki, dolayısıyla Rusiyanın da istifadə etməsi mümkündür. Verilən bəyanatların, təbii ki, heç bir məntiqi əsası yoxdur. Onların bir hissəsi Ermənistan cəmiyyətinə hesablanmış bəyanatlardır, mesajlardır. Xüsusilə də Lavrovun səsləndirdiyi fikirlər və o fikirlərin içərisində Azərbaycan ərazilərinin Rusiya silahları ilə işğal olunmasının xatırladılması, daha sonra isə bəlli olduğu kimi, hər zaman Rusiyanın Ermənistan-Azərbaycan ərazilərinin tanınmasından təəccübləndiyinin təkrarən vurğulanması, əslində bütün bunlar bizim üçün heç bir yeni məqamlar deyil. Bu, Rusiyanın ənənəvi mövqeyidir. Amma eyni zamanda bu həm Ermənistandakı revanşistlərə və bütövlükdə Ermənistanın özünə hesablanmış bir mesajdır. Görünən mənzərə bundan ibarətdir ki, Rusiya bölgədə davamlı sülhün və Ermənistanla Azərbaycan arasında birbaşa aparılan danışıqlar nəticəsində əldə olunacaq sülhün qəbul olunmasında maraqlı deyil”.
Tahirə AĞAMİRZƏ
