29.11.2025, 14:20 144
- Mən Laçında doğulub boya-başa çatan bir rəssam kimi uzun illər Vətən həsrəti ilə yaşamışam. Laçının işğalı illərində çəkdiyim rəsmlərdə o nisgilin, ağrının izləri həmişə duyulub.
Bu sözləri jurnalistlərə açıqlaması zamanı rəssam Yusif Mirzə deyib.
“İşğaldan əvvəl yaratdığım əsərlər də, işğaldansonrakı dövrün ruhunu daşıyan rəsmlər də mənim üçün böyük mənaya malikdir. Bu gün isə böyük bir xoşbəxtliyi sizinlə bölüşmək istəyirəm. Avqustun 26-sında Laçın Şəhəri Günündə burada sərgi keçirdim və Laçın mövzusuna həsr etdiyim silsilə rəsmlər tamaşaçıların böyük marağı ilə qarşılandı. İnsanların diqqəti, rəğbəti və hisslərini bölüşməsi mənə həm qürur, həm də yeni yaradıcılıq enerjisi verdi”, - deyə rəssam vurğulayıb.
O, Laçına geri dönüşün hər kəs üçün tərifəgəlməz sevinc hissi yaratdığını deyib: “Bu doğma torpağın dirçəlişini, inkişafını, canlanmasını yenidən seyr etmək sözlə ifadə edilməyəcək qədər böyük xoşbəxtlikdir. Bu günləri bizə yaşadan şəhidlərimizin ruhu qarşısında baş əyir, onlara Allahdan rəhmət diləyirik. Laçının bərpası və inkişafı üçün göstərdiyi xüsusi diqqətə görə Prezident İlham Əliyevə isə dərin minnətdarlığımızı bildiririk. Onun bu fəaliyyətini böyük hörmət və sayğı ilə qiymətləndiririk. Mən öz əl işlərimdə Laçının gözəlliyini, azadlıqdan sonra yenidən doğuluşunu, inkişafını və gələcəyə doğru ümidlə baxan simasını ifadə etməyə çalışıram. Bu gün biz yeni bir Laçının yarandığının şahidiyik və inanırıq ki, gələcəkdə hər şey daha gözəl, daha mükəmməl olacaq”. (AZƏRTAC)
