23.02.2023, 09:33 442
- Müəllimi dərs dediyi Vətən uğrunda şəhid olmuş şagirdi haqqında danışır. Amma necə, sanki bir az çəkinə-çəkinə, hiss edirsən ki, Cavid əlaçı şagird olmayıb. Bəlkə elə bu üzdən də, müəllimi onu heç sevməyib. Amma Cavid bu həyatda ən böyük dərsindən - çətin imtahanından əla qiymət alıb. Çünki o, Vətəninin dar günündə onunla bir olub. Qanlı savaşlarda bu 21 yaşlı gənc yaralı olmasına baxmayaraq silahını yerə qoymayıb. Elə bu vəziyyətdə mühasirədə qalan dostlarının köməyinə çatıb. Elə həmin qəhrəmanlıq anında da, ən uca məqama - şəhadətə ucalıb. İndi o dili topuq vuran bir müəllimin deyil, bütöv bir xalqın, milyonların sevimlisi, adı-əməli yeniyetmələrimizə nümunə olan bir insan, Vətənin Şəhid övladıdır.
Bu gün haqqında bəhs etdiyimiz Vətən Müharibəsi şəhidi, igid əsgər Kərimov Cavid Mərdan oğlunun doğum günüdür. O, 1999-cu il fevralın 23-də Yevlax rayonunun Aşağı Bucaq kəndində anadan olub. Doğma kənddə orta məktəbi bitirib. Sonra hərbi xidmətə yollanıb. Ancaq hərbçi olmaq istəyi onu yenidən müddətdən artıq hərbi xidmətə sövq edib.
Cavid Kərimov 2020-ci il sentyabrın 27-də başlanan Vətən müharibəsi zamanı Suqovuşan və Murovdağ istiqamətində gedən döyüşlərdə mərdliklə savaşıb. 2020-ci il fevralın 7-də Tərtər istiqamətində gedən döyüşlərdə qəhrəmancasına şəhid olub.
Şəhidimiz Yevlaxda Şəhidlər Xiyabanında böyük izdiham və el məhəbbəti ilə torpağa tapşırılıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatıldığı və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Prezident İlham Əliyevin sərəncamları ilə "Vətən uğrunda", “Cəsur döyüşçü” və "Suqovuşanın azad olunmasına görə" medalları ilə təltif edilib.
Ordumuzun mərd əsgəri, Vətən müharibəsi qəhrəmanlarından olan Cavid Kərimovun adı qəlbimizdə həmişə yaşayacaq. 21 yaşında Zəfər tariximizə öz qanıyla adını həkk edən igid oğlumuzu Vətən heç vaxt unutmayacaq .
Cənnətdəki doğum günün mübarək, məzarın nurla dolsun, Cavid balamız!
Mina RƏŞİD
