13.12.2022, 12:49 286
- Yusif Səmədoğlu adına “İlin ən yaxşı nəsr əsəri” müsabiqəsinə start verilib. Yazıçılar Birliyindən verilən məlumata görə, Qarabağdakı zəfərimiz və şəhidlərimizin ruhuna hörmət əlaməti olaraq müsabiqənin birinci ili istisna hal kimi 2020-ci ilin noyabrından bu günə qədər yalnız Qarabağ mövzusunda yazılan əsərlər qəbul olunacaq. Növbəti ildən etibarən mövzu məhdudiyyəti aradan qaldırılacq və müəlliflər istənilən mövzuda yazılan nəsr əsərlərini təqdim edə biləcəklər.
Müsabiqəyə təqdim edilən materiallar kitab və ya əlyazma şəklində ola bilər. İkipilləli keçirilməsi nəzərdə tutulan müsabiqənin birinci turunda qəbul edilən əsərlər münsiflər heyəti tərəfindən 10 ballıq sistem üzrə qiymətlənidiriləcək və nəticələrə müvafiq hər janr üzrə 3 ən yaxşı əsər seçilərək ikinci tura təqdim olunacaq. İkinci turda gizli ekspertlər bu 3 əsərin müəllifləri arasından müvafiq janrlar üzrə qalibləri müəyyənləşdirəcək. Müsabiqənin nəticələri hər Novruz bayramı ərəfəsində açıqlanacaq və qaliblər aşağıdakı məbləğlə mükafatlandırılacaq.
Ən yaxşı roman - 3000 manat
Ən yaxşı povest - 1500 manat
Ən yaxşı hekayə - 500 manat
Qeyd edək ki, müsabiqəyə əsərlərin qəbulu 2023-cü il yanvar ayının 25-nə qədər davam edəcək. Yazılar 3 nüsxədən ibarət olmaqla, həftəiçi hər gün aşağıdakı ünvana təqdim olunmalıdır:
Bakı, Xaqani - 53, Azərbaycan Yazıçılar Birliyi
Əlaqə telefonu: 051 307 83 99
Mina RƏŞİD
