21.04.2026, 07:50 14
- Otuz ildən sonra doğma Ağdama qayıtmaq mənim üçün sözlə ifadə olunmayacaq qədər böyük xoşbəxtlikdir. Uzun illər bu torpaqlardan uzaq düşsəm də, yurd həsrəti heç vaxt qəlbimdən silinmədi. İndi isə uşaqlığımın keçdiyi məkanlara yenidən ayaq basmaq, ata-baba ocağını görmək həm duyğulu, həm də qürurverici bir hissdir. Bu günə hər zaman inanırdım və şükürlər olsun ki, həmin arzu gerçəyə çevrildi.
Bu sözləri açıqlamasında Ağdam şəhərindən olan keçmiş məcburi köçkün Mənzər Əliyeva bildirib.
Sakin vurğulayıb ki, işğaldan azad edilən torpaqlara həyat yenidən qayıdır. Bundan sonrakı həyatını doğma yurdunda davam etdirməyi planlaşdırır və artıq ailəsi ilə birlikdə bu torpaqlara qayıdır.
“Müzəffər Ali Baş Komandan İlham Əliyevin rəhbərliyi və Azərbaycan Ordusunun qəhrəmanlığı nəticəsində ölkəmizin ərazi bütövlüyünün bərpa olunması tarixi hadisədir. Dövlətimiz tərəfindən göstərilən diqqət və qayğıya görə minnətdaram. Azərbaycan əsgərlərinə təşəkkürümü bildirirəm, şəhidlərimizə Allahdan rəhmət, qazilərimizə isə şəfa diləyirəm”, - deyə M.Əliyeva qeyd edib.
