02.12.2025, 11:01 11
- İnsanların əksəriyyəti zəkalarının dəqiq elmləri üzrə deyil, humanitar istiqamətdə inkişaf etdiyini düşünür. Lakin riyazi məsələləri həll edə bilməmək zəkanın buna uyğun olmadığı demək deyil. Məsələ burasındadır ki, riyazı məsələlər həll edərkən, hansısa hesablama apararkən ürək daha sürətlə döyünür və bəzən qəribə hallar keçirilməsi də baş verir. Fikir dağınıqlığı ilə əlaqədar olaraq diqqəti cəmləmək çətinləşir. Yəqin ki, “riyazi narahatlıq” sindromu adlandırılan həmin hiss çoxlarına tanışdır.
Azərbaycan Dövlət Pedaqoji Universitetinin müəllimi Sona Əliyeva "Vətən səsi"nin əməkdaşı ilə söhbəti zamanı “Riyazı narahatlıq” sindromu barədə maraqlı fikirlər söyləyib. Psixoloq qeyd edib ki, tədqiqatçıların fikrincə, dünya əhalisinin 20 faizi həmin sindromdan əziyyət çəkir və riyaziyyatı zəif qavrama səbəblərindən birini də bunda axtarmaq lazımdır. Yaranan gərginlik yaddaşı zəiflədir. Riyazi çalışmaları həll edə bilməmək qorxusu uğursuz nəticələr əldə etməyə səbəb olur.
Sona Əliyeva bunu həm də valideyn və müəllimlərin uşaqlara təzyiqi ilə əlaqələndirir: “Bəzi mədəniyyətlərdə riyaziyyatı yaxşı bilmək ağıllı olmaq kimi qiymətləndirilir. Tədqiqatlar göstərir ki, rahatlama texnikası, nəfəsalma məşqləri şagirdlər arasında riyazi çalışmaları həlletmə göstəricilərini artırır. Beyinin riyazi zəkanı ehtiva edən hissəsi həmişə inkişafda ola bilər. Cinsindən asılı olmayaraq dərketmə qabiliyyəti eynidir. Müəllimlər də şagirdlərin potensialına fər qoymadan onların hər birində eyni dərəcədə özünə inam hissini formalaşdırmağı bacarmalıdır”.
