28.11.2025, 09:00 232
- Cavadın ata-anası onunla fəxr edir, igid övladları ilə bağlı qürurla danışırlar. Deyirlər ki, Cavad Vətəni canından da çox sevən oğul idi. Müharibə başlayanda Cavad könüllü cəbhəyə yollandı, Vətən uğrunda vuruşmağı o çoxdan gözləyirdi. Doğmaları nə qədər çətin olsa da torpaqlarımızın işğaldan azad edilməsi və Cavadın bu yolda şəhadətə qovuşması ilə təskinlik tapırlar. Ata da, ana da “Vətən sağ olsun!”, - deyir...
Bu gün Şanlı Vətən Müharibəsinin qəhrəman şəhidi Cavad Gülverdi oğlu Babayevin doğum günüdür. O, 28 noyabr 1998-ci ildə Masallı rayonunun Qızılağac kəndində anadan olub. 2005-2016-ci illərdə Qızılağac kənd 2 nömrəli tam orta məktəbində təhsil alıb. 2017-2018-ci illərdə Gədəbəy rayonunda həqiqi hərbi xidmətini şərəflə başa vurub. Tikinti şirkətində işləyib.
Cavad Babayev Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı könüllü olaraq döyüşlərə qatılıb. Cəbrayıl və Qubadlının azadlığı uğrunda gedən döyüşlərdə şücaətlər göstərib.
Vətənin mərd oğlu Cavad Babayev Qubadlının azad olunması uğrunda gedən döyüşlərdə qəhrəmancasına şəhadətə ucalıb. Şəhidimiz 11 noyabr 2020-ci ildə doğma Qızılağac kəndində böyük izdiham və ehtiramla torpağa tapşırılıb.
Cavad Babayev ölümündən sonra Azərbaycan Prezidentinin müvafiq sərəncamlarına əsasən “Cəbrayılın azad olunmasına görə”, “Qubadlının azad olunmasına görə”, “Cəsur döyüşçü” və “Vətən uğrunda” medalları ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
