13.11.2025, 12:37 214
- Müasir dövrdə uşaqların hüquqlarının qorunması, onların sağlam və təhlükəsiz mühitdə inkişaf etməsi hər bir cəmiyyətin əsas vəzifələrindən biridir. Azərbaycanda bu istiqamətdə həyata keçirilən dövlət siyasəti ardıcıl və məqsədyönlü şəkildə davam etdirilir.
Şərqi Zəngəzur Regional Təhsil İdarəsinin tabeliyində fəaliyyət göstərən ümumi təhsil müəssisələrində “Uşaq hüquqları aylığı” ilə əlaqədar silsilə maarifləndirici tədbirlər təşkil olunub. Bu tədbirlər çərçivəsində məktəblərdə "Dəyirmi masa"lar, xüsusi dərslər, təqdimatlar, maarifləndirici seminarlar və digər fəaliyyətlər həyata keçirilib.
Tədbirlər zamanı şagirdlərə uşaq hüquqlarının mahiyyəti, bu sahədə dövlət tərəfindən görülən islahatlar və qanunvericilikdəki əsas müddəalar barədə ətraflı məlumat verilib. Qeyd olunub ki, ölkəmizdə uşaq siyasətinin təməli Ümummilli Lider Heydər Əliyev tərəfindən qoyulub və bu siyasət hazırda Prezident İlham Əliyev tərəfindən uğurla davam etdirilir.
Bildirilib ki, Azərbaycanda uşaqların rifahı və hüquqlarının müdafiəsi dövlət siyasətinin prioritet istiqamətlərindəndir və bu sahədə davamlı addımlar atılır. Qeyd edək ki, “Uşaq hüquqları aylığı” çərçivəsində keçirilən tədbirlər noyabrın 20-dək davam edəcək.
Tahirə AĞAMİRZƏ
