• Emilin bircə bacısı var, o hərbi xidmətdə general-mayor Polad Həşimovun əsgəri olduğu üçün fəxr edirdi. 4 il Türkiyədə işlədikdən sonra doğma Vətəninə qayıtmışdı. Az sonra Tovuz hadisələri zamanı sevimli komandiri Polad Həşimovun şəhadətindən sarsılaraq könüllü orduya yazılır. Emil istəyirdi ki, ata-anası onunla qürur duysun. İndi anası torpaqlarımız uğrunda canını fəda edən şəhid balasının məzar daşını qucaqlayaraq onunla fəxr etdiyini söyləyir...

Bu gün Şanlı Vətən Müharibəsinin qəhrəman şəhidi Emil Tərlan oğlu Hümbətovun doğum günüdür. O, 30 oktyabr 1992-ci ildə Şirvan şəhərində anadan olub. 1999-cu ildə Şirvan şəhər 16 nömrəli tam orta məktəbin 1-ci sinfinə daxil olub, 2008-ci ildə orta təhsilini peşə təhsili ilə davam etdirib. 2010-cu ildə Şirvan Peşə liseyini bitirən Emil Hümbətov Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Şirvan Şəhər Şöbəsi tərəfindən Azərbaycan Silahlı Qüvvələrinə həqiqi hərbi xidmətə çağırılıb, Daşkəsən rayonu N saylı hərbi hissədə xidmət edib.

2012-ci ildə General-mayor Polad Həşimovun rəhbərliyi ilə hərbi xidmətini ləyaqətlə başa vurduqdan sonra bir müddət Şirvan şəhərində işləyib. 2016-cı ildə işləmək üçün Türkiyə Respublikasına gedən Emil 4 ildən sonra 2020-ci ildə Vətəninə, ailəsinin yanına qayıdıb. Məsuliyyətli, işgüzar, bacarıqlı olması sayəsində tezliklə Hacıqabul rayonu Atbulaq qəsəbəsində yerləşən MMC-də işə başlayıb. 2020-ci ilin iyul ayında Tovuz rayonu istiqamətndə baş verən şiddətli döyüşlərdə genaral-mayor Polad Həşimovun şəhid olması xəbərindən sarsılan Emil könüllü olaraq Vətəni qorumağa hazır olduğu haqqında Hərbi Komissarlığa müraciət edib. Sentyabrın 21-də hərbi təlimlərə çağırılıb. O manqa başçısı, topçu idi. Vətən müharibəsinin 15-ci günündə, 11 oktyabr 2020-ci ildə Füzuli istiqamətində gedən ağır döyüşlərdə qəhrəmanacasına şəhid olub.

Emil Hümbətov 12 oktyabr 2020-ci ildə Şirvan şəhər Şəhidlər Xiyabanında böyük izdiham və ehtiramla torpağa tapşırılıb.

Azərbaycan Prezidenti, Müzəffər Ali Baş Komandan İlham Əliyevin sərəncamlarına əsasən Emil Hümbətov ölümündən sonra “İgidliyə görə”, “Füzulinin azad olunmasına görə” və “Vətən uğrunda” medalları ilə təltif edilib. 

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim.

Mina RƏŞİD