• İlkini anası 10 yaşından atasız böyüdüb. Ana-bala çox mehriban olublar. İlkin ürək sözünü həmişə anasıyla bölüşüb. Anası deyir ki, hələ o mənə  20 yaşına qədər bir dəfə də cavab qaytarmayıb. İlkin dərslərini yaxşı oxuyurdu. Bununla belə heç vaxt anasını tək qoymurdu, ona işlərində kömək edirdi. İlkinin bircə qardaşı vardı. O hərbi xidmətdən qayıdanda qardaşı Vətənə borcunu ödəməyə getmişdi. Onlar iki qardaş Vətən müharibəsində vuruşdular. Döyüşlərdə qardaşının yaralanması xəbərini anasından gizlətmişdilər. İlkin qardaşını o qədər çox istəyirdi ki, yoldaşlarına vəsiyyət edəndə də onu düşünmüşdü. Demişdi ki, qardaşımdan muğayat olun. İndi qardaşı ondan ötrü çox darıxır. Amma o da anası kimi İlkinlə fəxr edir. Deyirlər ki, İlkin kimi oğulların sayəsində torpaqlarımız düşməndən azad olunub. Bütün şəhidlərimizin ruhu şad olsun!   

Bu gün Vətən müharibəsinin qəhrəman şəhidi İlkin Rauf oğlu Əsgərovun doğum günüdü. O, 9 sentyabr 2000-ci ildə Gəncə şəhərində dünyaya göz açıb. Orta təhsilini Gəncə şəhər Nizami Gəncəvi adına 11 nömrəli tam orta məktəbdə aldıqdan sonra həqiqi hərbi xidmətə yollanıb.

Azərbaycan Ordusunun əsgəri olan İlkin Əsgərov 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Füzuli, Xocavənd və Şuşa uğrunda vuruşaraq şücaətlər göstərib.

İlkin Əsgərov 9 noyabr 2020-ci ildə Şuşanın azad olunması uğrunda gedən döyüşlərdə qəhhrəmancasına şəhadətə ucalıb.

Şəhidimiz 17 noyabr 2020-ci ildə Gəncə şəhərinin Şəhidlər xiyabanında böyük izdihamla dəfn edilib.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən İlkin Əsgərov ölümündən sonra "Vətən uğrunda", "Şuşanın azad olunmasına görə" və

“Cəsur döyüşçü” medalı ilə təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD