20.08.2025, 09:51 245
- Mirnağı hərbi xidmətini cəbhə bölgəsində keçirib. O, bundan qürur duyub və and içib ki, bir gün torpaqlarımızın düşməndən geri alınmasında mərdliklə vuruşacaq. Buna görə də təlim-məşqlərdə daha fəal olub, yağıya yerini göstərməkdən ötrü döyüş sirlərinə dərindən, mükəmməl yiyələnib. Çalışqanlığı, bacarığı nəticəsində bu sahədə günü-gündən təcrübəsi, səriştəsi artıb...
Bu gün Vətən müharibəsinin qəhrəman şəhidi, gizir Mirnağı Qasım oğlu Şərifovun doğum günüdü. O, 20 avqust 1995-ci ildə Cəlilabad rayonunun Bəcirəvan kəndində dünyaya göz açıb.
Azərbaycan Silahlı Qüvvələrinin giziri olan Mirnağı Şərifov 2020-ci il sentyabrın 27-dən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində iştirak edib. Mirnağı Füzuli və Cəbrayıl uğrunda gedən döyüşlərdə şücaətlər göstərib.
Mirnağı Şərifov 21 oktyabr 2020-ci ildə döyüş tapşırığının yerinə yetirilməsi zamanı qəhrəmancasına şəhadətə ucalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin müvafiq sərəncamlarına əsasən Mirnağı Şərifov ölümündən sonra "Vətən uğrunda, "Kəlbəcərin azad olunmasına görə", "Şuşanın azad olunmasına görə", "Hərbi xidmətlərə görə" medalları və “Rəşadət” ordeni ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
