• Atası deyir ki, Samir heç vaxt məni bir övlad kimi incitməmişdi. O, öz yerini, sözünü bilən oğul idi. General Polad Həşimovun şəhadətindən sonra Samir də vətənpərvər gənclərimiz kimi çox hiddətlənmişdi. Sentyabrın 21-də başlanan bir həftəlik təlimdən sonra Samir döyüşlərə qatıldı. Həmişə zəng edəndə deyirdi ki, darıxmayın, biz qalib gələcəyik! Elə qalib də gəldik. Samir Vətən uğrunda şəhid oldu. Torpaqlarımız uğrunda şəhid olan bütün oğulların hər biri qəhrəmandı. Biz onlarla fəxr edirik.   

Bu gün 44 günlük Vətən müharibəsinin qəhrəmanlarından biri olan  Samir Azər oğlu Abbasovun doğum günüdür. O, 1997-ci il iyulun 10-da Neftçala rayonunun Xol Qaraqaşlı kəndində anadan olub. O, 2002-ci ildə Neftçala rayonu Xol Qaraqaşlı kəndində Qismət Nuralıyev adına tam orta məktəbin 1-ci sinfinə daxil olub, 2014-cü ildə həmin məktəbi bitirib.

Samir Abbasov 2015-ci ildə Azərbaycan Silahlı Qüvvələrinin sıralarında Naxçıvan Muxtar Respublikasında yerləşən "N" saylı hərbi hissədə müddətli həqiqi hərbi xidmətə başlayıb. 2018-ci ildə Binəqədi rayon peşə liseyinə daxil olub və aşbazlıq ixtisasına yiyələnib.  

Azərbaycan Ordusunun əsgəri Samir Abbasov 2020-ci il sentyabrın 27-də Azərbaycan Silahlı Qüvvələri tərəfindən Ermənistanın işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü olaraq iştirak edib. O, Füzuli, Cəbrayıl, Qubadlı, Xocavənd və Şuşanın azadlığı uğrunda gedən döyüşlərdə mərdliklə vuruşub.

Samir Abbasov 2020-ci il noyabrın 7-də Şuşa istiqamətində döyüş tapşırığının yerinə yetirilməsi zamanı qəhrəmancasına şəhadətə ucalıb. Şəhidimiz noyabrın 23-də doğma Neftçala rayonunda doğulduğu  kənddə böyük izdiham və ehtiramla torpağa tapşırılıb.

Müzəffər Ali Baş Komandan İlham Əliyevin müvafiq sərəncamlarına əsasən şəhid Abbasov Samir Azər oğlu ölümündən sonra "Vətən uğrunda", "Şuşanın azad olunmasına görə", İgidliyə görə", "Cəbrayılın azad olunmasına görə" və "Xocavəndin azad olunmasına görə" medalları ilə təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD