22.04.2025, 09:50 293
- Vətən naminə, torpaqlarımızın işğaldan azad olunması uğrunda canından keçən oğullarımızdan biri də Həsənov Təbriz Bəxtiyar oğludur. Bu gün Təbrizin anım günüdür. Təbriz Həsənov 1996-cı il 27 yanvar tarixində Hacıqabul rayonu Qızılburun kəndində anadan olub. 2002-ci ildə Seyfulla Məmmədov adına 110 saylı tam orta məktəbin birinci sinfinə daxil olub. 2011-ci ildə həmin məktəbin doqquzuncu sinfini müvəffəqiyyətlə bitirəndən sonra Neft və Energetika kollecinə yüksək balla qəbul olunub. 2015-ci ildə kollecdə təhsilini başa vurub. Elə həmin il iyulun birində Gəncə şəhərində hərbi xidmətə yola düşüb. Əsgər Təbriz Həsənov oktyabr ayında Ağdam rayonunun Sarıcalı kəndinə göndərilib.
Ordumuzun əsgəri Təbriz Həsənov 2016-cı ildə baş verən Aprel döyüşlərində iştirak edərək şücaətlər göstərib. Döyüşlərdə fəallığına görə Təbriz “Kiçik çavuş” rütbəsinə layiq görülüb.
İgid döyüşçü, kiçik çavuş Təbriz Həsənov 2016-cı il aprelin 22-də Ağdamın Çəmənli kəndində gedən döyüşlərdə qəhrəmancasına şəhadətə ucalıb.
Şəhidimiz doğma Qaradağ rayonunun Şəhidlər xiyabanında böyük izdiham və ehtiramla torpağa tapşırılıb.
Təbriz Həsənov döyüşlərdə göstərdiyi şücaətlərə görə ölümündən sonra Azərbaycan Prezidenti tərəfindən "Hərbi xidmətdə fərqlənməyə görə" III dərəcəli medalı ilə təltif edilib.
Cənnətdəki doğum günün mübarək, ruhun şad olsun, məzarın nurla dolsun, qəhrəman şəhidim!
Mina RƏŞİD
