01.04.2025, 20:34 104
- "Zəfər" Şəhid Ailələrinə Dəstək İctimai Birliyinin təşkilatçılığı, Türkiyə Respublikasının Ailə və Sosial Xidmətlər Nazirliyi, Türkiyə Müdafiə Sənayesi Komitəsi və "Azərbaycan Hava Yolları" QSC-nin dəstəyi ilə Azərbaycandan olan məktəbli şəhid övladları üçün Türkiyə Respublikasının paytaxtı Ankara şəhərində keçirilən texno-düşərgəsinə yekun vurulub.
25 məktəbli şəhid övladının qatıldığı düşərgənin sonuncu günündə iştirakçılar ilk olaraq ASELSSAN şirkətinin kampusunu ziyarət edərək peyk texnologiyaları barədə biliklər əldə ediblər.
Daha sonra Türkiyə Respublikası Sosial Xidmətlər Nazirliyinin Uşaq Müəssisəsində keçirilən oratoriya tədbirinə qatılan düşərgə iştirakçıları burada Türkiyə və Azərbaycan arasındakı dostluq və qardaşlıq münasibətlərini əks etdirən bədii kompozisiyalara tamaşa ediblər. Tədbirdə xüsusi hazırlanmış musiqili və ədəbi çıxışlar təqdim olunub, həmçinin düşərgə iştirakçıları da öz növbəsində şeirlər səsləndirərək, xatirə nitqləri ilə çıxış ediblər.
Günün sonunda isə düşərgə iştirakçıları üçün Ankara qalasına və ətraf ərazilərə maraqlı ekskursiya təşkil olunub. Tarixi qala divarları və şəhərin panoramik mənzərəsi iştirakçılarda dərin təəssürat yaradıb. Bələdçilər tərəfindən iştirakçılara Ankara qalasının tarixi, onun Osmanlı və Səlcuq dövrlərindəki strateji əhəmiyyəti, həmçinin burada aparılan bərpa işləri barədə ətraflı məlumat verilib. Daha sonra iştirakçılar qalanın yaxınlığında yerləşən tarixi küçələri gəzərək, qədim tikililərlə tanış olublar.
Qeyd edək ki, 24-27 mart tarixlərində keçirilən bu düşərgə ərzində iştirakçılar Türk Aerokosmik Sənayesi (“TUSAŞ”) və “ASELSAN” şirkəti kampuslarını ziyarət edərək aerokosmik mühəndislik və peyk texnologiyaları barədə nəzəri və praktiki biliklər əldə ediblər.
Tahirə AĞAMİRZƏ
