• Vüqar orta məktəbdə yaxşı oxumuşdu, onun arzusu bu idi ki, hərbi xidmətindən sonra ali təhsil alıb, çalışıb doğmalarının çətin kənd həyatında onlara dayaq olsun. Əksər kənd cavanları kimi Vüqar da ürəyini anasına açar, ona gələcək arzularından danışardı. Vətən müharibəsi başlayanda Vüqarın illərlə ürəyində gəzdirdiyi qisas hissi alovlandı, daha heç kəs onu yolundan saxlaya bilməzdi. O, könüllü olaraq torpaqlarımızın azadlığı uğrunda döyüşlərə qatıldı. Vüqar hər kəndin, qəsəbənin, şəhərin azad olunmasına sevinir və bunu doğmaları ilə paylaşırdı. Həmişə deyirdi ki, biz qələbə çalıb evimizə Zəfərlə qayıdacağıq... İndi bütün əzizləri onun adı, amalı ilə qürur duyurlar. Fəxr edirlər ki, bu böyük qələbənin qazanılmasında Vüqarın da xidməti var....

Bu gün Vətən müharibəsinin qəhrəman şəhidi Vüqar Tumarxan oğlu Mövlanovun doğum günüdür. O, 11 dekabr 1994-cü ildə Lerik rayonunun Günəşli kəndində anadan olub. 2000-2011-ci illərdə Lerik rayon Günəşli kənd tam orta məktəbində təhsil alıb. Vüqar Mövlanov 2013-cü ildə Azərbaycan Silahlı Qüvvələrinin sıralarında müddətli həqiqi hərbi xidmət qulluqçusu olub. Hərbi xidmətini başa vurduqdan sonra 2 il mühafizə polisi olaraq çalışıb.

Azərbaycan Ordusunun əsgəri olan Vüqar Mövlanov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü olaraq iştirak edib. Füzulinin, Hadrutun və Şuşanın azadlığı uğrunda gedən döyüşlərdə mərdliklə vuruşub.

Vüqar Mövlanov 6 noyabr 2020-ci ildə Şuşa istiqamətində döyüş tapşırığının yerinə yetirilməsi zamanı qəhrəmancasına şəhadətə ucalıb. Şəhidimiz doğma Lerik rayonunun Günəşli kəndində böyük izdiham və ehtiramla torpağa tapşırılıb.

Azərbaycan Prezidenti İlham Əliyevin müvafiq sərəncamlarına əsasən Vüqar Mövlanov ölümündən sonra "Vətən uğrunda", "Qubadlının azad olunmasına görə", "Füzulinin azad olunmasına görə", "İgidliyə görə" və "Şuşanın azad olunmasına görə" medalları ilə təltif edilib.

Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!

Mina RƏŞİD