06.12.2024, 15:28 215
- Xəbər saytın hər bir oxucusuna aydın olmalıdır.
Bu sözləri Oxu.az saytının baş redaktor müavini Fərid Novruzov Report Media Məktəbinin tələbələri ilə görüşdə deyib.
F.Novruzov qeyd edib ki, hətta mövzudan xəbərdar olmayan hər bir oxucu ilk andan yazının mahiyyətini dərk etməlidir:
“Əgər siz xəbəri oxuyub anlaya bilmirsinizsə, deməli oxucu da məlumatı qavraya bilməyəcək. İnformasiyanın vacib məqamlarını və mahiyyətini çatdırmaq çox əhəmiyyətlidir. Yaşadığınız ərazidə mövcud olan sosial, məişət problemlərini də unutmamalısınız. Xəbərlər rəngarəng olmalı, press-relizlər isə yığcam hala gətirilməlidir. Tərcümədə isə sərbəstliyə yol verilə bilər. Hər şey gündəmdən və redaksiya siyasətindən asılıdır".
Baş redaktorun müavini süni intellektin müasir mediaya təsirindən də danışıb.
“Süni intellektdən jurnalistikada geniş istifadə edilir, tərcüməyə, foto və mətnlərin yaradılmasına yardım edir. Dünyanın bir sıra aparıcı KİV-ləri süni intellektdən müxtəlif işlərdə yararlanırlar. Bu texnologiya həm də yeni yanaşma tərzini ortaya qoymaqla redaktorun işinə təsir edir. Mənfi tərəfləri də var. Bu, keyfiyyətin aşağı enməsi və ya yanlış məlumatın verilməsi kimi hallar yaradır. Ən ciddi problem iş yerlərinin azalması ola bilər”, - jurnalist deyib.
Fərid Novruzov 1992-ci ildə Bakıda anadan olub. 2014-cü ildə Rusiyanın Voronej Dövlət Universitetinin beynəlxalq münasibətlər fakültəsini bitirib. 2016-cı ildə APA agentliyində jurnalist fəaliyyətinə başlayıb. Bir müddət AzərTAC-da çalışıb. 2024-cü ilin iyun ayından Oxu.az saytında baş redaktorun müavini vəzifəsində çalışır. (Report)
