06.11.2024, 11:50 361
- Ailənin yeganə oğul övladı olan Şəhriyar bir bacının qardaşı idi. O, uşaqlıqdan zəhmətə alışmışdı. İllərlə xəstə atasına, babasına qayğı göstərmişdi. Şəhriyar atasını itirəndən sonra çiyninə nə qədər ağır yük düşsə də həyatda öz yolunu tapmağa çalışır. Müəllimləri deyirlər ki, o, çox savadlı şagird idi. Şəhriyar təkbaşına həyatla mücadilə edərək öz biliyi və bacarığı ilə Bakı Dövlət Universiteinə daxil olmuşdu. Həmişə anasına ürək-dirək verərdi. Deyərdi ki, ana, heç nədən qorxma, mən həmişə səninləyəm. Anasına verdiyi sözü tutaraq müxtəlif işlərdə çalışmışdı. Şəhriyar hərbi xidmətdə olanda Aprel döyüşlərində də iştirak etmişdi. O, Vətən müharibəsində tez-tez cəbhədən anasına zəng edirdi. Deyirdi, müharibə tezliklə bitəcək və mən evimizə, sənin yanına qayıdacam... İndi anasına onsuz çox çətindi. Amma bununla belə şəhid anası başını dik tutur və doğma, igid balası ilə fəxr elədiyini söyləyir...
Bu gün Vətən müharibəsi qəhrəmanlarından olan şəhid Şəhriyar Vidadi oğlu Həbibinin anım günüdür. O, 1993-cü il yanvarın 19-da Lənkəran rayonunun Osaküçə kəndində anadan olub. Kənddə orta məktəbdə oxuyub. 2010-2014-cü illərdə Bakı Dövlət Universitetinin fizika fakültəsində təhsil alıb. O, 2016-cı ildə hərbi xidmətdə olduğu dövrdə Aprel döyüşlərində iştirak edib.
Şəhriyar Həbibi Azərbaycan Respublikasının ərazi bütövlüyü uğrunda 27 sentyabr 2020-ci il tarixindən başlanan Vətən müharibəsində Cəbrayıl, Zəngilan istiqamətində gedən döyüşlərdə iştirak edib. O, oktyabrın son günlərində Qubadlı döyüşlərində qəhrəmancasına şəhadətə ucalıb. Şəhidimiz noyabrın 6-da böyük izdiham və ehtiramla doğma Lənkəranda torpağa tapşırılıb.
Azərbaycan Prezidenti İlham Əliyevin müvafiq sərəncamlarına əsasən Şəhriyar Həbibi ölümündən sonra "Vətən uğrunda", "Qubadlının azad olunmasına görə" və "Cəsur döyüşçü" medalları ilə təltif edilib.
Ruhun şad olsun, məzarın nurla dolsun, qəhrəman Şəhriyar balamız!
Mina RƏŞİD
