11.08.2024, 16:25 264
- Qasımov Rəhman Məmmədxan oğlu 1938-ci il fevralın 22-də Qubadlı Rayonunun Çərəli kəndində anadan olmuşdur. Atası Məmmədxan Qasımov kolxoz sədri olmaqla yanaşı, həm də kənddə 8 illik məktəbin açılmasına nail olan maarifpərvər insan olub.
Rəhman Qasımov orta təhsilini 1945-ci ildə Çərəli kəndində yerləşən 4 illik məktəbdə, 5-8-ci sinifləri Boynəkər kənd məktəbində, 9-10 cu sinifləri isə Xanlıq kənd orta məktəbində alıb. Orta məktəbi bitirdikdən sonra Bakı şəhəri 1 saylı tibb texnikumuna daxil olub, 1957-ci ildə buranı bitirərək sənədlərini həm Bakı Dövlət Universitetinə, həm də Azərbaycan Tibb İnstitutuna verib. Hər ikisinə qəbul olsa da, o, Tibb İnstitutunu seçib. 1962-1968 ci illərdə Tibb Institutunun Müalicə-Profilaktika fakultəsində təhsil alıb. İnstitutu bitirdikdən sonra 2 ildən çox Bakıda Melikov adına 6 saylı Xəstəxanada və Dəmiryol Xəstəxanasında işləyib. Daha sonra Qubadlı Rayon Mərkəzi Xəstəxanasında fəaliyyətini davam etdirib.
1982-ci ildə baş həkimin müavini olaraq Bakı şəhərində iki aylıq ixtisasartırma kursunda olub, daha sonra 1985, 2002, 2005, 2010-cu illərdə də həkim-otorinolarinqoloq kimi ixtisasartırma kurslarında iştirak edib, 1982-ci ilin 17 iyulunda SSRİ Səhiyyə Nazirliyinin "Səhiyyə əlaçısı" döş nişanı və vəsiqəsi ilə təltif olunub. 1985-ci ilin 5 avqust tarixində ona Azərbaycan Respublikasının “Əmək veteranı” vəsiqəsi verilib.
Elə həmin il 6 ay müddətinə Qubadlı RMX-nın baş həkimi vəzifəsini icra edib, daha sonra uzun illər baş həkimin müavini kimi çalışıb.
1993-cü ildə məlum hadisələrlə bağlı Sumqayıt şəhərində məcburi köçkün kimi yerləşib və 1994-cü ildə yenidən Qubadlı RMX-da fəaliyyətini davam etdirib, eyni zamanda Sumqayıt şəhər 1 saylı poliklinikada da ixtisası üzrə çalışıb. 2014 cü ildə Sumqayıtda yerləşən “Doktor Az” klinikasında fəaliyyət göstərib. Rəhman Qasımov həm də uzun illər həkim tibb komissiyasında da üzv olaraq çalışıb. O, 2017-ci il noyabrın 1-də dünyasını dəyişib.
Hazırladı: Tahirə AĞAMİRZƏ
