09.06.2024, 08:01 398
- Aslanov Bayram Hüseyn oğlu 1928-ci il mart ayının 22-də Qubadlı rayonunun Əyin kəndində anadan olub. Orta təhsilini Qubadlı rayonunda alıb. 1948-ci ildə orta məktəbi bitirdikdən sonra həmin il Tibb İnstitutuna qəbul olunub. 1954-cü ildə institutu bitirdikdən sonra Qubadlı rayonuna qayıdaraq, Səhiyyə Nazirliyinin göndərişi ilə Xocahan kənd məntəqəsinə baş həkim vəzifəsinə təyin olunub. 1956-cı ildə isə Bayram Aslanov Səhiyyə Nazirliyinin Kollegiyasının qərarı ilə Qubadlı Rayon Mərkəzi Xəstəxanasının baş həkimi vəzifəsinə irəli çəkilib. Onun rəhbərliyi ilə həmin dövrdə xəstəxananın həkimlərinin səyi nəticəsində malyariya xəstəliyi tamamilə aradan qaldırılıb, su çiçəyi və qızılca kimi xəstəliklərin geniş yayılmaması üçün peyvəndləmə aparılıb, vərəm infeksiyasının sayı azalıb.
1963-cü ildə rayonların birləşməsi ilə əlaqədar olaraq, Qubadlı Rayon Mərkəzi Xəstəxanası Zəngilan Rayon Mərkəzi Xəstəxanasının tərkibində fəaliyyət göstərdiyi üçün Bayram Aslanov orada 1 il müddətinə həkim-cərrah kimi çalışıb. 1964-cü ildən isə Qubadlı RMX-da baş həkimin müalicə işləri üzrə müavini və həkim-cərrah kimi fəaliyyət göstərib. İşlədiyi müddətdə o, yüksək ixtisaslı cərrah kimi gərgin cərrahiyyə əməliyyatları apararaq, çox insanı yenidən həyata qaytara bilib. 1988-ci il hadisələri zamanı yaralıların xəstəxanaya yerləşdirilməsi, şəhidlərin ailələrinə təhvil verilməsi və dəfn olunması işini təşkil edib.
1993-cü ildə Qubadlı rayonu işğal olunduqdan sonra isə Sumqayıt şəhərində 2 saylı poliklinikanın nəzdində fəaliyyət göstərən Qubadlı Rayon Mərkəzi Xəstəxanasında fəaliyyətini davam etdirib.
Bayram Aslanov 1995-ci ildə oktyabrın 13-də vəfat edib.
Hazırladı: Tahirə AĞAMİRZƏ
