30.07.2022, 09:00 245
- Bu gün onun günüdür. Kamil də günlərin heç birində unudulmayan müqəddəs şəhidlərimizdən biridir. Onun həyatı ilə tanış olarkən düşünürsən ki, cəmi 22 illik ömrünə gör nələri sığışdırıb... Adına yaraşıq olub sanki, uşaqlıqdan zirvələrə can atıb. Ailəli idi, Vətənə bir övlad əmanəti var…
Salahov Kamil Mətləb oğlu 1998-ci il iyulun 30-da Yevlax rayonunun Aran qəsəbəsində anadan olub. O, şəhid Vüqar Əmiraslanov adına tam orta məktəbi bitirib. Orta məktəbdə oxumaqla bərabər həm də, musiqi məktəbində, qarmon sinifində təhsil alıb. Uşaqlıqdan idmana böyük həvəs göstərib. Kamil müxtəlif idman növləri ilə məşğul olub. O, qarışıq idman növü olan MMA üzrə beşqat Azərbaycan çempionudur.
Gürcüstanda, Türkiyədə keçirilən yarışlarda qalib gəlib, 2012-ci ildə yeniyetmələr arasında MMA üzrə İranda keçirilən yarışda isə dünya çempionu adını qazanıb. 2016-cı ildə hərbi xidmətə yollanıb. Elə o vaxtdan da, hərbçi olmağa qərar verib. Odur ki, hərbi xidmətini başa vursa da bu sahəyə olan böyük həvəsi onu hərbi məktəbə gətirib.
2020-ci il sentyabrın 27-də başlanan və 44 gün davam edən Vətən Müharibəsində Kamil Talış və Suqovuşanın işğaldan azad olunması uğrunda gedən döyüşlərdə iştirak edib. Düşmənin doqquz postunu yaran qəhrəmanımız yaralı döyüş yoldaşlarını xilas etməyə can atarkən düşmənin snayper gülləsi ilə başından yaralanıb. K.Salahov sentyabrın 28-də Suqovuşan istiqamətində şəhidlik zirvəsinə ucalıb. Onun döyüş yolu qısa olsa da, Vətən uğrunda savaşda göstərdiyi şücaətlər yaddaşlara həkk edilib və tariximizin qızıl səhifələrinə yazılıb. K.Salahov sentyabrın 29-da doğma rayonun Aran qəsəbə qəbiristanlığında dəfn olunub. Müzəffər Ali Baş Komandan İlham Əliyevin müvafiq sərəncamları ilə ölümündən sonra “Suqovuşanın azad olunmasına görə” və “Vətən uğrunda” medalları ilə təltif edilib.
Şəhidlər ölməz, Vətən bölünməz!
Doğum günün mübarək, ruhun şad olsun, şəhidim!
Mina RƏŞİD
