• “Böyük qızımız Xədicə dünyaya gələndə Asif dəmiryolunda işə düzəldi. Bu bizim üçün ikiqat sevinc oldu. Müharibənin son gününə qədər döyüşdü. Mən ağlayırdım, amma o elə danışırdı ki, elə bil cəbhədə yox, beş ulduzlu oteldə idi. Bir dəfə də narahatçılığını bildirmədi, sonradan bildim ki, nə əziyyətlər çəkib. Şəkillərindən və videolarından gördüm. Noyabrın 7-də axırıncı danışığımız oldu. O başqa-başqa nömrələrdən zəng edirdi. Mən o nömrələri yaddaşa yazmışdım. Gecə dayanmadım bir-bir əsgər yoldaşlarının hamısına zəng elədim. Ancaq biri ilə danışa bildim. Dedi ki, o bizi qurtardı, amma sonrasını bilmirik. Son nəfəsində telefonunu döyüş yoldaşlarına verib ki, bunu həyat yoldaşıma çatdırın. Asif çox gözəl insan idi, ailəsini, uşaqlarını çox sevirdi. Ancaq onun başqalarına, Vətənə münasibəti də belə idi...” Bu sözləri qəhrəman şəhidimiz Asif Qocayevin həyat yoldaşı söyləyir...

Bu gün Zəfər tariximizin qəhrəmanlarından olan şəhid Asif Yolçu oğlu Qocayevin doğum günüdür. O, 1991-ci il martın 1-də Gəncə şəhərində anadan olub. Gəncə şəhər 26 nömrəli tam orta məktəbdə təhsil alıb. Asif dəmiryolçu idi. Onu Vətən müharibəsinə doğma kollektivi yüksək əhval-ruhiyyə, təntənə ilə yola salıb.

Azərbaycan Ordusunun əsgəri olan Asif Qocayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsinə könüllü olaraq qatılıb. O, Xocavəndin Hadrut qəsəbəsi, Füzuli, Qubadlı, Laçın və Şuşa rayonlarının azad olunması uğrunda gedən döyüşlərdə iştirak edib. Müharibənin sonuna qədər vuruşub. Döyüşlər zamanı bir çox yaralı əsgər yoldaşını xilas edib. Özü yaralı olsa da yoldaşlarını düşünüb.

Asif Qocayev noyabrın 8-də Şuşa döyüşləri zamanı qəhrəmancasına şəhadətə ucalıb. Gəncə Şəhidlər Xiyabanında böyük izdiham və ehtiramla torpağa tapşırılıb.

Azərbaycan Prezidenti İlham Əliyevin müvafiq sərəncamlarına əsasən Asif Qocayev ölümündən sonra "Vətən uğrunda", "Cəsur döyüşçü" və "Şuşanın azad olunmasına görə" medalları ilə təltif edilib.

Cənnətdəki doğum günün mübarək, məzarın nurla dolsun, qəhrəman şəhidim!

Mina RƏŞİD