09.10.2023, 10:00 406
- “Döyüşdə bərk yaralanan Nəcməddin əynindəki paltarla yarasını sarıyaraq yenidən düşmənlə savaşmağa davam edir. Döyüşdən sonra onlar maşına minirlər. Nəcməddin komandirini soruşur. Ona deyirlər ki, komandiri şəhid olub və nəşi neytral zonada qaldığı üçün onu götürmək mümkün olmayıb. Nəcməddinin elə bunu eşitməyi ilə maşından atlanıb yerə düşməyi bir olur. Xeyli məsafədən sonra nəhayət o komandirinin olduğu yerə çataraq onun nəşini götürərkən özü də qəhrəmancasına şəhadətə ucalır”. Vətən müharibəsi qəhrəmanı şəhid əsgər Nəcməddin Sarkayevin anası oğlu haqqında bunları qürurla danışır.
Bu gün doğum günü olan Nəcməddin Əli oğlu Sarkayev 1999-cu il oktyabrın 9-da Balakən rayonunun Şərif kəndində anadan olub. 2006-2017-ci illərdə N.Davudov adına 1 saylı Şərif kənd tam orta məktəbində təhsil alıb. 2017-ci ildə müddətli həqiqi hərbi xidmətə çağırılan Nəcməddin Sarkayev 2017-2019-cu illərdə Azərbaycan Silahlı Qüvvələrinin Tərtər rayonunda yerləşən “N” saylı hərbi hissəsində xidmət göstərib.
Azərbaycan Silahlı Qüvvələrinin əsgəri Nəcməddin Sarkayev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı könüllü olaraq Ağdərə və Suqovuşanın azadlığı uğrunda gedən döyüşlərdə mərdliklə savaşıb.
Nəcməddin Sarkayev noyabrın 5-də Ağdərə döyüşləri zamanı yaralı halda şəhid olmuş komandrinin nəşini döyüş yerindən çıxardığı vaxt qəhrəmancasına şəhadətə ucalıb.
Şəhidimiz doğma Balakən rayonunun Şərif kəndində böyük bir izdihamla torpağa tapşırılıb.
Ölkə başçısı, Müzəffər Ali Baş Komandan İlham Əliyevin sərəncamlarına əsasən Nəcməddin Sarkayev ölümündən sonra “Vətən uğrunda” və “Suqovuşanın azad olunmasına görə” medalları ilə təltif edilib.
21 yaşlı şəhidimizin xatirəsinə böyük ehtiramla Sədərək Ticarət Mərkəzinin həyətində büstü qoyulub.
Cənnətdəki doğum günün mübarək, məzarın nurla dolsun qəhrəman Nəcməddin balamız!
Mina RƏŞİD
