08.06.2022, 09:00 473
- Unikal bir layihə olan və ilk dəfə təşkil olunan Peşələr Festivalının keçirilməsində məqsəd gənclərin, onların valideynlərinin, ümumiyyətlə karyera məsləhətinə ehtiyacı olan kateqoriyanın düzgün peşə seçiminə dəstək göstərilməsidir. Bu, çox vacib istiqamətdir. Çünki hazırda əmək bazarında kifayət qədər çox peşə var. Lakin onların arasında ən aktuallarını seçməli və gəncləri ehtiyac olan peşələrə yönləndirməliyik. Festivalı keçirməkdə məqsədimiz məhz bundan ibarət idi. On şəhərdə keçirilən festivalda paytaxt istisna olmaqla, 25 min gənc iştirak etdi.
Bunu Əmək və Əhalinin Sosial Müdafiəsi Nazirliyinin tabeliyində Dövlət Məşğulluq Agentliyinin İdarə Heyətinin sədri Mustafa Abbasbəyli deyib.
Sədrin sözlərinə görə, Dövlət Məşğulluq Agentliyi peşələrin hər birinin qeydiyyatını aparıb: "Bundan sonrakı mərhələdə onların hər biri dəvət olunacaq və daha uzunmüddətli və peşəkar karyera məsləhəti xidmətləri göstəriləcək. Seçilən peşələrə uyğun olaraq həm agentliyin tərkibində olan Peşə Hazırlığı mərkəzləri, eyni zamanda, əməkdaşlıq etdiyimiz 37 özəl tədris mərkəzləri vasitəsilə onların peşə öyrənməsinə dəstək olacağıq.
Peşələr Festivalının hər il keçirilməsini nəzərdə tuturuq. Növbəti dövrlərdə festivalı daha geniş əhatə dairəsi və ərazilərdə təşkil etmək istəyirik. Azad edilmiş torpaqlarda yaşayış üçün şərait yaradıldıqdan və əhalinin həmin yerlərə köçürülməsindən sonra orada da Peşələr Festivalı keçiriləcək". (AZƏRTAC)
