04.08.2023, 17:56 261
- Laçın Rayon İcra Hakimiyyətinin başçısı Aqil Nəzərlinin sakinlərlə növbəti səyyar görüş - qəbulu Səbail rayonunun Badamdar qəsəbəsində keçirilib. Laçın rayonunun Badamdar ümumi orta məktəbinin binasında keçirilən görüşdə əvvəlcə Vətən müharibəsi şəhidi Etibar Nəcəfovun məktəb binasının qarşısında inşa edilmiş xatirə abidəsi önünə qərənfil dəstələri düzülüb və şəhidin əziz xatirəsi ehtiramla yad edilib.
Sonra 35 nəfər laçınlı keçmiş məcburi köçkünün iştirak etdiyi səyyar qəbulda çıxış edən icra başçısı ölkə Prezidenti cənab İlham Əliyevin rəhbərliyi ilə 44 günlük Vətən Müharibəsində qazanılan qələbədən, qısa müddət ərzində işğaldan azad olunmuş ərazilərdə aparılan geniş tikinti və quruculuq işlərindən, ölkə rəhbərinin işğaldan azad olunmuş ərazilərə mütəmadi səfərlərindən və Böyük Qayıdışdan danışıb.
Rayon rəhbəri çıxışında eyni zamanda şəhid ailələrinə, müharibə əlillərinə, məcburi köçkünlərə göstərilən diqqət və qayğıdan söz açıb.
Səyyar qəbulda məcburi köçkünlərin müraciətləri dinlənilib, həmin müraciətlərə baxılması üçün aidiyyəti üzrə tapşırıqlar verilərək, icrası nəzarətə götürülüb.
Qəbulda Laçın Rayon İcra Hakimiyyəti başçısı aparatının məsul işçiləri, həmçinin müvafiq inzibati ərazi dairəsi üzrə nümayəndəliyin əməkdaşları iştirak ediblər.
Səyyar qəbulda iştirak edən rayon sakinləri doğma torpaqlarımızın işğaldan azad olunmasına, onlara dövlət tərəfindən göstərilən davamlı diqqət və qayğıya görə ölkə Prezidenti cənab İlham Əliyevə minnətdarlıqlarını bildiriblər.
Hazırladı: Mina RƏŞİD
