• Yanvarın 1-dən vergi məcəlləsində qüvvəyə minən bir sıra dəyişikliklər iqtisadiyyatın ağardılması ilə yanaşı,  sakinlərin azad edilmiş ərazilərə geri dönüşünə də dəstək olacaq. Belə ki, azad edilmiş ərazilərdə qeydiyyatdan keçmiş rezidentlərdən vergi tutulması ilə bağlı vergi məcəlləsinə yeni fəsil əlavə olunub.  Auditorlar Palatasının üzvü Səftər Vəliyevin fikrincə, bu dəyişiklik və əlavələr azad edilmiş ərazilərdə iqtisadiyyatın canlanmasına və investisiya cəlbediciliyinin artırılmasına səbəb olacaq.

Səftər Vəliyev bildirib ki, yeni dəyişikliyə əsasən işğaldan azad edilmiş ərazinin rezidentləri 2023-cü il yanvarın 1-dən etibarən  10 il müddətində  mənfəət, gəlir,  əmlak, torpaq və sadələşdirilmiş vergilərdən azad edilmişdir. Bundan başqa, ƏDV-nin məqsədləri üçün qeydiyyatda olan işğaldan azad edilmiş  ərazilərin rezidentləri tərəfindən siyahısı təsdiq edilmiş iqtisadi fəaliyyət sahələri və mallar üzrə texnikanın, texnoloji avadanlıqların və qurğuların, habelə  xammal və materialın idxalı 2023-cü il yanvarın1-dən etibarən 10 il müddətində ƏDV-dən azad edilmişdir. Eyni zamanda işğaldan azad edilmiş ərazinin rezidenti olan hüquqi  şəxslərin səhmdarlarının divident gəlirləri 2023-cü il yanvarın 1-dən etibarən 10 il müddətində vergidən azad edilmişdir.

Yeni dəyişikliklər azad edilmiş  ərazilərə səfər edən insanları da əhatə edəcək. Belə ki, əhali həmin ərazilərdə mehmanxana  tipli obyektlərdə qalmaqda maraqlı olacaq. Çünki ƏDV geri al kampaniyasından daha çox vəsait əldə edəcəklər. Bu isə azad edilmiş rayonlarda turizmin inkişafına xüsusi dəstək olacq.

Əvvəlki ilin qaydalarına əsasən,  qaytarılan  ƏDV məbləği nağdsız ödənişlərin tərkibindəki ƏDV-nin 15 faizini, nağd ödənişlərdə isə 10 faizini təşkil edirdisə, artıq  bu ildən etibarən nağdsız qaydada alış-veriş edən zaman  ödənilmiş ƏDV-nin 17,5 faizi, nağd formada ödəniş edən zaman ödənilmiş ƏDV-nin 5 faizi geri qaytarılacaqdır. Bundan başqa, işğaldan azad edilmiş ərazilər daxilində mehmanxanalar tərfindən göstərilən  gecələmə və qalma xidmətlərinə görə nağdsız qaydada ödənilən ƏDV-nin 30 faizi, nağd qaydada ödənilən ƏDV-nin 5 faizi geri qaytarılacaqdır.

Araşdırmalar göstərir ki, ƏDV geri al kampaniyasına maraq ildən-ilə artır. Dövlət Vergi xidmətindən verilən məlumata görə, 2020-ci ilin 1 sentyabr tarixinə qədər ƏDV geri al üzrə 305 milyon manatdan çox vəsait qaytarılıb. Halbuki 2021-ci ilin müvafiq dövründə qaytarılan vəsait 120 milyona yaxın idi. Yəni 2020-ci ilin may ayında fəaliyyətə başlamış bu xidmət 2022-ci ildə daha məşhurlaşıb və iqtisadiyyatın ağardılmasına daha çox dəstək verib. Sözsüz ki, nağdsız ödənişlər zamanı geri qaytarılan vəsaitlərin artırılması əhali arasında ƏDV geri al kampaniyasını daha da məşhurlaşdıracaq. Bu isə öz nəticəsində dövriyyələrin ağardılmasına daha böyük töhfə verəcək.

Hazırladı: Tahirə AĞAMİRZƏ