29.08.2025, 14:13 221
- Bu ilin avqustun 1-nə Qarabağ iqtisadi rayonu üzrə kredit qoyuluşlarının həcmi 509,531 milyon manat təşkil edib.
Bu barədə Mərkəzi Bankdan məlumat verilib.
Məlumata görə, bu göstərici əvvəlki ayla müqayisədə 9,5 milyon manat və ya 1,9%, ötən ilin eyni dövrünə nisbətən isə 53,090 milyon manat və ya 11,6% çoxdur.
Hesabat dövründə sözügedən region üzrə kredit qoyuluşlarının orta faiz dərəcəsi 19,60%-ə bərabər olub.
Dövr ərzində regiona qoyulmuş kreditlərin 508,326 milyon manatı milli valyutada, 1,205 milyon manatı isə sərbəst dönərli valyutada (SDV) yerləşdirilib.
Eyni zamanda, bu ilin avqustun 1-nə Şərqi Zəngəzur iqtisadi rayonu üzrə isə kredit qoyuluşlarının həcmi əvvəlki ayla müqayisədə 1,1 milyon manat və ya 9,5% artaraq, 12,933 milyon manata bərabər olub.
Hesabat dövründə bu göstərici üzrə orta faiz dərəcəsi 17,87% təşkil edib.
Sözügedən dövr ərzində regiona qoyulmuş kreditlərin 12,236 milyon manatı milli valyutada, 697 min manatı isə sərbəst dönərli valyutada (SDV) yerləşdirilib.
Qeyd edək ki, 2025-ci ilin avqustun 1-nə Azərbaycanın cəmi regionları üzrə kredit qoyuluşlarının həcmi 28,498 milyard manata bərabər olub. Bu göstərici əvvəlki ayla müqayisədə 26,038 milyon manat və ya 0,1%, 2024-cü ilin eyni dövrü ilə müqayisədə isə 2,803 milyard manat və ya 10,9% çoxdur. (Trend)
