15.03.2023, 11:31 257
- Bu gün ölkəmiz daha bir beynəlxalq konfransa ev sahibliyi edir. İslamofobiya ilə mübarizə gününə həs olunan böyük beynəlxalq konfrans öz işinə başlayıb. Tədbirdə təbii ki, gözləntilər böyükdür.
“Azərbaycan İslam dünyasında işğal olunan torpağını azad edən tək ölkədir”.
Bu fikirlər ölkəmizdə keçirilən islamofobiya ilə mübarizə gününə həsr olunmuş beynəlxalq konfransda İslam Əməkdaşlıq Təşkilatının (İƏT) keçmiş baş katibi Ekmeleddin İhsanoğlu jurnalistlərə açıqlamasında bildirib.
O, vurğulayıb ki, islamofobiya bütün İslam dünyasını və eyni zamanda bəşəriyyəti narahat edən bir təhlükənin adıdır: “Qərbin islam dünyasına qarşı göstərdiyi bu münasibət köhnə xəstəlikdir. Sadəcə son illər kommunikasiyanın inkişafı ilə bu hal daha çox diqqəti cəlb edir. Ona görə də Bakıda keçirilən konfrans problemin akademik səviyyədə müzakirəyə çıxarılması üçün münbit şərait yaradıb”.
Keçmiş baş katib qeyd edib ki, islamofobiyanın təzahürləri hər ölkədə fərqli formada özünü göstərir: "Qarabağda baş verən hadisələrə ümumi şəkildə yanaşılmalı olduğu halda, bir çox hallarda problemə erməni-azərbaycanlı, dolayısı ilə xristian-müsəlman formatında yanaşılıb".
E.İhsanoğlu bildirib ki, Ermənistanın 30 illik işğalı dövründə Azərbaycan torpaqlarında törətdiyi vəhşiliklər, məscidlərin dağıdılması, təhqir edilməsi də islamofobiyanın ən böyük təzahürlərindən biridir: "Sevindirici haldır ki, Azərbaycan 44 günlük Vətən müharibəsi ilə bu işğala son qoydu və tariximizə, mədəniyyətimizə qarşı törədilən vəhşiliyə son verildi”,-deyə E.İhsanoğlu fikrini tamamlayıb.
Tahirə AĞAMİRZƏ
