05.11.2025, 13:54 220
- Azərbaycanla Ermənistan arasında davam edən sülh danışıqları prosesi Brüsseldə də diqqətlə izlənilir.
"Vətən səsi" xəbər verir ki, bunu Brüsseldə keçirilən “Sülhün kəsişməsi: Regional bağlılıq tərəqqiyə aparan yol kimi” adlı konfransda çıxışı zamanı "Rasmussen Global"ın təsisçisi və NATO-nun keçmiş baş katibi Anders Foq Rasmussen bildirib. O, qeyd edib ki, Bakı ilə İrəvan arasında sülh razılaşmalarının məntiqi sonluqla başa çatması Avropanın siyasi mərkəzlərinin də maraqlarına tam cavab verir: "Cənubi Qafqazda sülh əldə edilə bilər. Sülh sazişi həm Ermənistan, həm də Azərbaycan üçün yeni tərəqqi dövrünü başlada bilər. Ümid edirik ki, Azərbaycan bu təklifi tezliklə qəbul edəcək".
NATO-nun keçmiş baş katibi deyib ki, Avropa İttifaqı da Cənubi Qafqazda sülh quruculuğu prosesində mühüm rol oynayıb. Rasmussenin fikrincə, hazırkı şəraitdə də birliyin bu proseslərdə rolu vacibibdir: "Avropanın prioriteti Ermənistanla Azərbaycan arasında sülhün bərqərar olmasına, eləcə də Ermənistanla Türkiyə arasında münasibətlərin normallaşmasına dəstək olmalıdır".
Konfrans zamanı Ermənistan Təhlükəsizlik Şurasının katibi Armen Qriqoryan Ermənistan, Azərbaycan və ABŞ liderləri tərəfindən imzalanmış 8 avqust 2025-ci il tarixli Vaşinqton Birgə Bəyannaməni xatırladıb. Qriqoryan bildirib ki, bu, sülh və rifahın əsasını qoyan tarixi hadisə, regionun blokdan çıxarılmasında həlledici addımdır. Onun fikrincə, davamlı sülh o zaman mümkündür ki, o, qarşılıqlı iqtisadi maraqlar və siyasi iradə ilə müşayiət olunsun.
Elxan SALAHOV
