• 52 ölkənin təmsil olunduğu III Şuşa Qlobal Media Forumu süni intellektin jurnalistikaya təsirini araşdıraraq etika, media savadlılığı və qlobal əməkdaşlığa ehtiyacı önə çəkib.

Bu barədə “Euronews” nəşrinin III Şuşa Qlobal Media Forumu haqqında dərc etdiyi “III Şuşa Qlobal Media Forumunda Süni İntellekt diqqət mərkəzindədir” sərlövhəli materialda qeyd olunub.

"Hamımızın birləşmək vaxtıdır? Süni intellekt üzrə savadlılığı artırmasaq, sosial medianın, rəqəmsal platformaların və süni intellektin geniş tətbiqi ciddi fəsadlara səbəb olacaq. Əgər bunu indi etməsək, nəticələrini gələcək onilliklər ərzində hiss edəcəyik", - Biznes və Yaradıcı Sənayelər Məktəbinin (UniSC) baş müəllimi Karen Sazerlend deyib.

Bildirilib ki, III Şuşa Qlobal Media Forumu süni intellektin jurnalistikaya artan təsirini araşdırmaq üçün 52 ölkədən 140-dan çox nümayəndəni bir araya gətirib:

“Müzakirələr zamanı dezinformasiya, süni intellektin məsuliyyətli inkişafı və bütün dünyada media savadlılığının artırılması zərurəti də daxil olmaqla problemlər müzakirə olunub".

Avropa Xəbər Agentlikləri Alyansının (EANA) baş katibi Aleksandru Giboy qeyd edib ki, süni intellekt həm təhlükə, həm də fürsətdir: “Əgər ondan düzgün istifadə edilmirsə, bu təhlükədir. Beləliklə, ictimaiyyətin mediaya olan inamı sarsılır. Ondan redaksiya işini təkmilləşdirmək və bəzi prosesləri sadələşdirmək üçün istifadə olunarsa, fürsətdir”.

Azərbaycan Prezidentinin köməkçisi - Prezident Administrasiyasının xarici siyasət məsələləri şöbəsinin müdiri Hikmət Hacıyevin sözlərindən sitat gətirilib. O qeyd edib ki, Azərbaycan çoxlu sayda jurnalistin və media mütəxəssislərinin foruma ideya və fikir mübadiləsi aparmaq üçün gəlməsindən olduqca qürur duyur.

"Süni intellekt dünyanın reallığıdır. Biz süni intellektlə mübarizə apara bilmərik, bu, texnoloji inkişafdır. Süni intellektlə mübarizə aparmaq o deməkdir ki, biz innovasiyalara, texnologiyaya qarşı mübarizə aparırıq. Buna görə də uyğunlaşmalı, peşəkar jurnalistika və media da daxil olmaqla insanlığın xeyrinə necə səmərəli istifadə edə biləcəyimizi anlamalıyıq", - o vurğulayıb.

Aparıcı xəbər agentliklərinin, texnoloji firmaların və akademik qurumların məruzəçiləri bu günün sürətlə dəyişən informasiya mühitində dayanıqlılığı artırmaq üçün daha güclü transsərhəd əməkdaşlığa çağırıblar.

Qeyd olunub ki, ev sahibi Azərbaycan üçün Forum həmçinin qlobal tendensiyaların formalaşmasında regionun genişlənən rolunu, süni intellektə uyğunlaşma və media bütövlüyünü möhkəmləndirmək öhdəliyini nümayiş etdirdi.  (Report)