“Bakı bu təxribatları cavabsız qoymayacaq”

• “Gözlənilirdi ki, Almaniya Prezidentinin Ermənistan və Azərbaycana səfəri qalmaqallı olacaq. Ştayenmayerin regiona sülh mesajı ilə gələcəyi açıqlansa da dünən Almaniyanın dövlət təbliğatçısı “Deutsche Welle” Qarabağla bağlı Ermənistanın bütün arxaik narrativləri ilə dolu olan "sənədli film" yayınladı, Almaniya Prezidentinin səhifəsində isə separatçıların Qarabağ barəsində rəvayətləri peyda oldu. Bütün bu təxribatlar bir daha sübut edir ki, “miatsum” qalıqlarının kökünü kəsməklə bağlı Azərbaycanın mövqeyi doğrudur”.

"Vətən səsi" xəbər verir ki, bunu politoloq Fərhad Məmmədov “Facebook” səhifəsində yazıb. O, hələ 2022-ci ilin sentyabrında şərti sərhəddə baş verən toqquşmalardan sonra Avropa İttifaqı (Aİ) və ABŞ-ın ərazi bütövlüyü prinsipi ilə bağlı açıqlamalarını xatırladıb: "Onda belə fikir doğuldu ki, Ermənistan hakimiyyəti Qarabağ mövzusundan geri çəkilməlidir. Qarabağı tərk etmiş ermənilərinin məsələsi isə Blinken, Makron və Ştaynmeyerlərin simasında Qərb tərəfindən həll ediləcək. Ermənistana göndərilən Aİ missiyası ermənilərin gələcəkdə Qarabağa köçürülməsi məqsədilə yaradılmışdı. Ancaq Azərbaycan bu layihənin reallaşmasına imkan vermədi və onların bütün planlar pozuldu”.

Politoloq bildirib ki, Azərbaycan danışıqların hazırkı mərhələsində ATƏT-in Minsk Qqrupunun buraxılmasını və Ermənistan konstitusiyasına dəyişiklik edilməsini tələb edir: “Almaniyanın bu təxribatları bir daha sübut edir ki, Ermənistan-Qarabağ mövzusu, Ermənistanın ərazi iddiası həmişəlik məhv edilməlidir. Ya Ermənistan hakimiyyəti bunu edəcək, ya da Azərbaycan bunu etməli olacaq. Minsk Qrupunun ləğv edilməsi mövzusu simvolik deyil, real addımlar tələb edir. ATƏT Xarici işlər nazirlərinin zirvə görüşündə iştirak edən ölkələr vasitəçilik institunun ləğvinə səs verməli və Qarabağ mövzusunun birdəfəlik qapanmasına imzalarını atmalıdırlar. Səbr və zəhmət hər şeyin öhdəsindən gələcək və Azərbaycan öz məqsədlərinə çatacaq. Azərbaycanın tələb etdiyi kimi, Almaniya da Minsk Qrupunun buraxılmasına səs verəcək. Separatizmə dəstək yolxucu infeksiyası alman siyasətçilərinin boş başlarında məhv edilməlidir”.

Fərhad Məmmədov vurğulayıb ki, Bakı küt təxribatları cavabsız qoymayacaq və texniki səhv olduğuna dair izahlar qəbul etmir: “Əgər bu səhvdirsə, Ştayenmayerin Bakı səfərindən əvvəl aparat işçilərinin işdən qovulması da daxil bütün məsul şəxslər cəzalandırılmalıdır. Əks halda, Almaniya Prezidentinin səfəri nəinki irəliləyiş gətirməyəcək, əksinə, danışıqlar prosesinə zərbə vura bilər. Məhz buna görə də Azərbaycan danışıqlar prosesinə kənardan hər hansı müdaxiləni müsbət qarşılamır".

Xatırladaq ki, Almaniya Prezidentinin sosial media profilində artıq keçmişin qalığı olan qondarma rejimin bayrağının yerləşdirilməsi və onun altında yazılan mətn Azərbaycan tərəfinin ciddi narazılığına səbəb olub. Dərhal iki ölkənin Prezident administrasiyaları və Xarici İşlər nazirlikləri arasında təmaslar başlayıb. Almaniya tərəfi bu postun səhvən yerləşdirildiyini etiraf edərək onu silib. Almaniya Prezidenti Administrasiyasının rəhbəri adından ünvanlanmış məktubda baş vermiş bu hadisəyə görə üzrxahlıq ifadə olunub.

Elxan SALAHOV