16.11.2024, 18:35 204
- Azərbaycan 2020-ci ildə öz gücü ilə ərazi bütövlüyünü bərpa edərək Qarabağ problemi həllinə nail oldu. Azərbaycan bu Zəfərlə müzəffər dövlət kimi Qafqazda gücə çevrilməklə yanaşı, həm də Avropa, Türk coğrafiyası baxımından əhəmiyyətli mövqe əldə etdi. Təbii ki, bu bölgələrin qlobal hadisələrə təsir göstərmək imkanına malik olduğunu da unutmamalıyıq. Bu gün Azərbaycanın beynəlxalq səviyyədə qəbul olunan qərarlarda yaxından iştirakı, irimiqyaslı layihələrə, o cümlədən BMT-nin İqlim Dəyişmələri üzrə Çərçivə Sazişinin Tərəflər Konfransının 29-cu Sessiyası (COP29) kimi mötəbər tədbirə ev sahibliyi etməsi, xüsusilə rəsmi Bakının bununla bağlı üzərinə düşən öhdəliyi ən yüksək səviyyədə yerinə yetirməsi Azərbaycanın qlobal arenada tutduğu mövqeyinin bariz göstəricisidir.
Bu fikirləri Türkiyənin Azərbaycandakı sabiq hərbi attaşesi, general Yücel Karauz açıqlamasında ifadə edib.
“Ümumiyyətlə, BMT-nin qlobal səviyyəli tədbirləri ancaq sabitliyin və firavanlığın hökm sürdüyü ölkələrdə təşkil edilir. Mövzuya bu tərəfdən yanaşsaq, COP29-un məhz Azərbaycanda keçirilməsi ölkənin nüfuzunun və dünyada tutduğu mövqeyin göstəricisidir. Bu gün Azərbaycanın simasında problemlərini özü həll etmiş müzəffər bir dövlətin söz sahibi olduğunu, gücünü göstərdiyini və beynəlxalq səviyyədə qazandığı hörməti görürük. Bu baxımdan, hazırda Azərbaycanda davam edən COP29-u təkcə BMT-nin iqlim problemləri ilə bağlı tədbiri kimi deyil, həm də Azərbaycanın tutduğu mövqe, qlobal səviyyədə əldə etdiyi nüfuzun göstəricisi kimi qiymətləndimək lazımdır”, - deyə general əlavə edib. (AZERTAC)
