• Uzun müddətdir ki, Qərb dairələri Cənubi Qafqaz regionuna daxil olmağa və burada möhkəmlənməyə çalışır. Əslində, bu amil region üçün çox təhlükəlidir. Çünki ən azı bəzi postsovet ölkələrinin təcrübəsinə nəzər yetirsək, Qərbin vədlərinə inananların aqibətinin fəlakətli sonluğuna şahidlik etmişik. Qərb indi də Cənubi Qafqazda bu fəlakətli vəziyyəti Ermənistanın əli ilə reallaşdırmağa çalışır.

Bu fikirləri açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib.

Deputat bildirib ki, son zamanlar bu proses daha da sürətlənib. Rəsmi İrəvanın Kollektiv Təhlükəsizlik Müqaviləsi Təşkilatından (KTMT), Avropa İqtisadi İttifaqından (Aİİ) uzaqlaşdırılması üçün müxtəlif layihələr həyata keçirilir. Avropa İttifaqının Müşahidə Missiyası adı altında Qərbin kəşfiyyat qrupunun Ermənistanda yerləşdirilməsi bu layihələrdən sadəcə biridir. ABŞ və Avropa İttifaqının hədəfləri sırasında Ermənistanı Rusiyadan uzaqlaşdırmaq da dayanırsa, digər hədəf Cənubi Qafqazda müharibəni yenidən alovlandırmaqdır. Onlar Ermənistanı Azərbaycanla sülh sazişi imzalamamağa təşviq edir. Fransanın İrəvanı silahlandırması da bunun göstəricisidir.

Deputatın sözlərinə görə, aprelin 5-də Brüsseldə keçirilən ABŞ-Ermənistan-Avropa İttifaqı üçlü görüşü isə Cənubi Qafqazda İrəvanın vasitəsilə yeni məkrli planların reallaşdırılması cəhdidir. Rəsmi açıqlamalarda görüşün Ermənistan iqtisadiyyatına və demokratiyanın inkişafına dəstək məqsədi daşıdığı bildirilsə də, əslində, bu “platformanın” Qərbin geosiyasi məqsədlərinə xidmət etməsi şübhə doğurmur. Ona görə də, Brüssel görüşünün məqsədləri regionumuzda sülh quruculuğu səylərinə böyük təhdiddir.

“Qərbin öz geosiyasi maraqları naminə bu təhlükəli davranışı region ölkələrinin maraqlarına xidmət etmir. Təsadüfi deyil ki, Türkiyə və Rusiya rəsmi bəyanat verərək Brüssel görüşü fonunda Qərbin planlarına kəskin etiraz ediblər. Qərbin planlarının bölgədə, sülhə və əməkdaşlığa xidmət etmədiyi, daha çox pozuculuq məqsədi daşıdığı bəyan olunub. Doğrudur, ABŞ və Avropa Komissiyası rəsmiləri dövlətimizin başçısı ilə telefon danışıqlarında bu görüşün ölkəmizə qarşı olmadığı, Ermənistanla iqtisadi əlaqələrin inkişafına həsr olunduğu barədə məlumat veriblər. Lakin aydın məsələdir ki, Qərb Azərbaycan və Türkiyə kimi dövlətlərlə sərhədləri bağlı olan Ermənistanı iqtisadi böhrandan xilas edə bilməz. Azərbaycana və Türkiyəyə qarşı düşmən münasibətdə olan, Rusiyadan uzaqlaşma xətti tutan Ermənistan regiona necə inteqrasiya oluna bilər? ABŞ-ın Ermənistandakı iqtisadi islahatları dəstəkləmək üçün ayıracağı 65 milyon dolların bu ölkəni dirçəldəcəyini düşünmək sadəlövhlükdür. Bundan əlavə, o da məlumdur ki, Ermənistan iqtisadiyyatı bu gün İran və Rusiyadan çox asılıdır. Yəni, Ermənistanın yaşaması Qərbdən deyil, Azərbaycan, Türkiyə, Rusiya və İrandan asılıdır. Belə olan halda, Qərb rəsmilərinin “Brüssel görüşü Ermənistana ticari-iqtisadi yardım xarakteri daşıyır” fikirləri reallıqdan tamamilə uzaqdır. Sadəcə burada bir niyyət var ki, müəyyən beynəlxalq güclər Cənubi Qafqazda kök salaraq bölgəni istədikləri kimi idarə edə bilsinlər. Bu mənada, Brüssel görüşünün əsas hədəflərindən biri Ermənistanın Rusiyadan uzaqlaşdırılması, bunun qarşılığında İrəvanın anti-Azərbaycan, anti-Türkiyə siyasətini dəstəkləməkdən ibarət idi. Nikol Paşinyanın “sülh kəsişməsi” layihəsini dəstəkləyən Qərb dövlətləri nədənsə, Ermənistanın Azərbaycanın sülh təkliflərinə niyə cavab verməməsinə, nə üçün işğal altındakı kəndlərimizi hələ də qaytarmamasına toxunmadılar. Eləcə də, Azərbaycanın Qərb rayonlarını Naxçıvanla birləşdirəcək Zəngəzur dəhlizinin açılması ilə bağlı da Ermənistana heç bir təzyiq göstərilmir. Lakin bir reallıq da var ki, Qərb kiçik və zəif Ermənistan vasitəsilə bölgədə öz planlarını reallaşdıra bilməyəcək. Burada zərər çəkən yalnız Ermənistanın özü olacaq”,- deyə Sevinc Fətəliyeva vurğulayıb. (AZERTAC)