01.04.2024, 11:23 281
Qazaxın işğal altında saxlanılan kəndlərindən 4-nü Azərbaycana qaytarmağa hazırlaşan Ermənistan hökumətinə müxalif qüvvələr bu prosesin reallaşmasının qarşısını almaq üçün yeni plan hazırlayıb.
"Vətən səsi" xəbər verir ki, bunu erməni jurnalist Oskan Sərkisyan deyib. O bildirib ki, “yerli əhali” bu prosesə mane olmağa hazırlaşır: “Nikol Paşinyanın 4 kəndi Azərbaycana geri qaytarmaq niyyəti ilə bağlı açıqlamalarına görə Tavuş bölgəsində böyük narazılıq var. Tavuşda torpaqların birtərəfli qaydada verilməsinə qarşı böyük ictimai hərəkat formalaşır. Hazırda onun 5 günə yekunlaşacaq təşkilati işləri gedir. İndi bu barədə ətraflı yazmıram. Çünki hakimiyyət prosesin qarşısını ala bilər”.
Erməni jurnalist 4 kəndin qaytarılmasına qarşı çıxan revanşist qüvvələrin öz istəyinə çatması üçün lazım olan bütün addımları atmağa hazır olduğuna da işarə edib.
Elxan SALAHOV
