15.01.2024, 18:51 286
- Artıq ölkəmizdə seçki proseslərinə başlanılıb. Bu gündən etibarən təbliğat-təşviqat kampaniyalarına start verilib. Əlbəttə, bu dönəmdə hər bir vətəndaş öz üzərinə düşən vəzifəni məsuliyyətlə yerinə yetirməlidir. Ölkənin taleyüklü məsələsində yaxından iştirak etməlidir. Çünki ölkəmizin gələcək müqəddəratını təyin etmək hər bir vətəndaşın da haqqıdır
Bunu açıqlamasında deputat Vüqar İskəndərov deyib.
“7 fevralda ölkəmizdə növbədənkənar prezident seçkiləri keçiriləcək. Tariximizdə ilk dəfə bu seçkilər bütöv, suveren Azərbaycanı əhatə edəcək. Xalqımız düzgün seçim etməlidir. Cənab prezidentin 20 illik fəaliyyəti göz qabağındadır. Biz təsəvvür etmədiyimiz qədər Azərbaycan güclü bir dövlətə çevrilir. Tarixinin qızıl dövrünü yaşayır.
Əlbəttə, bu mərhələyə çatmaq elə də asan olmayıb. Həm daxili, həm də xarici siyasətdə qazanılmış uğurlar Azərbaycanı güclü dövlətə çevirib", - o qeyd edib.
Deputat bildirib ki, hər seçkidə cənab prezidentə etimad, qarşıya qoyulmuş bütün hədəflərə çatmağa imkan yaratdı:
"İndi isə qarşıda daha böyük hədəflər var. Bu hədəflərə isə ancaq xalqımız doğru seçim etməklə çata bilər. Ona görə də seçki günü hər kəs öz seçimini doğru etməlidir. Hər birimiz bu ölkənin vətəndaşıyıq. Hər birimiz ölkəmizdə gedən proseslərdə maraqlı olmalıyıq.
Vətəndaşların üzərinə düşən əsas iş məhz seçkilərdə iştirak etməkdir. Necə ki cənab prezident xalqımız qarşısında verdiyi sözlərin hər birini tutdu, biz də xalq olaraq ona olan etimadımızı seçki bülletenlərində əks etdirməliyik”. (Trend)
