• Bakı ilə İrəvan arasında sülh prosesinin beynəlxalq vasitəçiliklə aparılması aktuallığını itirir.

Bu barədə britaniyalı jurnalist Onnik Krikoryan deyib.

“Düşünürəm ki, Fransanın Avropa İttifaqı Şurasının səylərində iştirakı Brüsselin sülh danışıqlarına dair platformasına zərbə vurub, bəzən isə hətta onu nüfuzdan salıb. Eyni zamanda, ABŞ-də keçiriləcək seçkilər prezidentliyə namizədlərin bəzilərinin Ermənistan-Azərbaycan münaqişəsindən öz şəxsi maraqları üçün istifadə etməsinə səbəb ola bilər”, - o bildirib.

Onun sözlərinə görə, ötən il Qranadada Avropa İttifaqı Şurasının Şarl Mişelin şəxsində təşkil etdiyi görüşdə Emmanuel Makron, Olaf Şolts və Nikol Paşinyan tərəfindən bəyanat verildi: "Prezidentlər İlham Əliyev və Rəcəb Tayyib Ərdoğanın orada olmamasına baxmayaraq, hər iki ölkəyə qarşı tələblər irəli sürüldü".

O.Krikoryan xatırladıb ki, məhz bu bəyanatdan sonra Azərbaycan açıq şəkildə tərəflər arasında, xüsusən neytral ölkələrdə və ya sərhəddə birbaşa danışıqlara çağırıb:

“Bakının hər hansı platformaya tam qarşı olduğuna əmin deyiləm. Lakin o, heç bir tərəfə (Aİ və ABŞ) neytral vasitəçi kimi baxmır. Çox güman ki, ikitərəfli danışıqlar tələbi daha çox Azərbaycanın vasitəçilərin qərəzli, eləcə də, açıq şəkildə ermənipərəst kimi qəbul edildiyi platformada iştirak etməyəcəyi barədə ABŞ və Aİ-ni xəbərdar etmək məqsədi daşıyır”.

Onun sözlərinə görə, hərbi qulluqçuların qarşılıqlı şəkildə təhvil verilməsinə dair, eləcə də iki ölkə arasında COP29 üzrə razılaşma çox əhəmiyyətli olub və ikitərəfli razılaşdırılıb. Bəzi erməni analitiklər bunun birbaşa ABŞ-nin Azərbaycana təzyiqinin nəticəsi olduğunu iddia edirlər, ancaq bu ifadəni dəstəkləmək üçün heç bir sübut yoxdur. Onu da qeyd edək ki, bu analitiklər ikitərəfli danışıqlara, hətta bəziləri sülh sazişinin imzalanmasına qarşıdırlar:

“İndi biz Azərbaycan xarici işlər nazirinin erməni həmkarı ilə sərhəd görüşü ilə bağlı son təklifi qəbul olunacağını gözləyirik. Bu, danışıqların tam ikitərəfli formata keçib-keçmədiyinin real göstəricisi olacaq. Bir çox məsələ ABŞ-nin 907-ci düzəlişi dayandırmağa razı olmasından asılı olacaq”.

"Bəzi beynəlxalq müşahidəçilər uzun müddətdir ki, ikitərəfli danışıqların yeganə irəliləyiş yolu olduğunu iddia edirlər: “İstənilən halda, sərhəddə görüşlər getdikcə daha çox keçirilirsə, hesab edirəm ki, sülh prosesinin beynəlxalq vasitəçiliklə aparılması aktuallığını itirir”, - deyə britaniyalı jurnalist vurğulayıb. (Report)