• Bütün ermənilərin katolikosu II Qareginin vəzifəsindən uzaqlaşdırılması artıq an məsələsidir. Onun hətta həbs ediləcəyi də gözlənilir.

"Vətən səsi xəbər verir ki, bu barədə Ermənistan mətbuatı məlumat yayıb. Bildirilir ki, Baş nazir Nikol Paşinyan və komandası hər gün 2026-cı il parlament seçkilərinin bütün mümkün ssenarilərini müzakirə edirlər.

İrəvanda nəşr olunan “Joqovurd” qəzeti isə hökumət dairələrindəki mənbələrinə istinadən yazır ki, gələn ilin yayında keçiriləcək seçkilərə qədər hökumətə müxalif mövqedə olan din xadimlərinin zərərsizləşdirilməsi prosesinin başa çatdırılması planlaşdırılır. "Təmizləmə əməliyyatı"na uyğun olaraq kilsə daxilində böyük dəyişiklər olacaq, yüksək vəzifə və nüfuz sahibi olan dindarlar işdən uzaqlaşdırılacaq: "Paşinyan üçün ən vacib məsələ seçki siyahısıdır. Siyahı tərtib olunarkən hər bir şəxsin tərcümeyi-halı, davranışı, nüfuzu ən xırda detallarına qədər araşdırılacaq. Paşinyanın siyahını təmizləməsi və seçkilərə özü ilə kimləri aparacağını müəyyənləşdirməsi üçün hələ uzun müddət lazım olacaq. Hakim komanda əmindir növbəti dəfə seçkilərdə qalib gələcəklər, onlarla rəqabət apara biləcək qüvvə yoxdur".

Nəşr yazır ki, parlament seçkiləri Nikol Paşinyanın özünün siyasi karyerası üçün taleyüklü məsələ olduğundan əlindəki bütün resursları mümkün təhlükələrin aradan qaldırılmasına yönəldir. Məhz buna görə vacib məsələlərdən biri həm ölkə daxilində böyük nüfuza malik olan, həm də Ermənistanı əldən buraxmaq istəməyən Rusiyaya bağlılığı şübhə doğurmayan katolikosun vəzifədən uzaqlaşdırılmasıdır: "Hakimiyyət dairələrindəki mənbələr bunun tezliklə həyata keçiriləcəyini bildirir. Bu məsələnin çox tez həll ediləcəyi, hər şeyin hazırlanmış plana uyğun getdiyi deyilir".

Xatırladaq ki, bir neçə gün əvvəl Erməni Apastol Kilsəsində hakimiyyətin tapşırıqlarını yerinə yetirən xüsusi qrup yaradıldığı barədə məlumat yayılmışdı. Həmin qrupun əsas hədəfi katolikosun yaxın ətrafında II Qareginə qarşı narazılıq yaratmaq və onu ictimai qınaq obyektinə çevirməkdir. Bu isə seçkilər ərəfəsində Paşinyana qarşı təxribatlar hazırlayan Rusiyanın sifarişlərini yerinə yetirəcək şəxslərin əvvəlcədən zərərsizləşdirilməsinə zəmin yaradacaq.

Elxan SALAHOV