13.06.2024, 17:32 265
- Doğma Şuşaya ilk köçdə yurduna qayıdan insanlardan biri də istedadlı şair, tanınmış jurnalist Kərim Kərimlidir. O, illərdi Şuşaya, Qarabağa həsr etdiyi şeirləri ilə oxucuların doğmasına çevrilib. Kərim Kərimlinin öz FB səhifəsində Şuşadan paylaşdığı iki şeirini “Vətən səsi”nin oxucularına ərməğan edirik.
YATMIŞ ARZULARI OYADAN ŞUŞA
Dünyanın gözəli, gözəl şerisən,
Dünyanın dünyaca özəl yerisən.
Yerlərin Göyüsən, Göyün Yerisən,
Baxırsan dünyaya qayadan, Şuşa,
Dünya boyda heyrət yaradan Şuşa!
Gecən – gündüz kimi, gündüzün – aləm!
Eşqinlə doludur könül piyaləm.
Talemə yazılmış əziz risaləm,
Gülüşlə çıxırsan sayadan, Şuşa,
Günəşin sübh yeri, Aya dan Şuşa!
Eşqim, məhəbbətim, adım-sanımsan,
Ən böyük sevincim, həyəcanımsan.
Ürəkdə ürəyim, canda canımsan,
Dönmüşəm qoynuna – azadam, Şuşa!
Yatmış arzuları oyadan Şuşa!
AĞACLAR
Yol üstündə əldə çiçək durmuşdu,
Yurda döndüyümü bilən ağaclar.
Başım üstə bəyaz çətir tutmuşdu,
Ağ çiçəkli deyb-gülən ağaclar.
Kölgəsinə qucaq deyib çağırdı,
Bölgəsinə ocaq deyib çağırdı.
"Sevgim – qucaq-qucaq!" – deyib, çağırdı,
Sevinc göz yaşımı silən ağaclar.
Yaşıl-yarpaq xoş dililə danışdı,
Dil-dil ötdü, beş dil ilə danışdı.
Budağından quş dililə danışdı
Nəğməsini paytək bölən ağaclar.
Hazırladı: Mina RƏŞİD
