30.11.2022, 10:47 706
- Qədim oğuz yurdu Zəngəzur mahalının sonrakı bölgülərə görə Qafan rayonu adlandırılan ərazisində vaxtilə yüzdən artıq azərbaycanlı kəndi var idi. Bu kəndlərdən biri olan Şabadin kəndi 1930-1995-ci illər arasında Qafan rayonunun inzibati-ərazi vahidinin tərkibində olmuş, rayon mərkəzindən 13 km şimal-şərqdə, Qafan-Gorus yolunun sol tərəfində meşəlik ərazidə yerləşir. Mənbələrdə qeyd olunur ki, ərazidə iki Şabadin kəndi olub: Oxçu Şabadini və Ecanan Şabadini.
1886-cı il siyahıyaalınmasında Yelizavet quberniyası, Zəngəzur qəzasının III şöbəsinin Arçevanik kənd icması tərkibinə daxil olan Ecanan Şabadini kəndində 48 evdə azərbaycanlılardan ibarət 261 nəfər qeydə alınmışdır. 1988-ci ildə şabadinlilər də öz doğma torpaqlarından qovulmuşlar. Oxçu Şabadini kəndi Qapıcıq dağının ətəklərində, Oxçuçayın kənarında yerləşirdi.
Şabadin sözünün mənası «iki dağ arasında yerləşən yaşayış məntəqəsi» kimi izah olunur.
1930-cu ildə Şabadin kəndində ibtidai məktəb açılmış, kolxoz qurulmuşdur. Sonralar kənddə orta məktəb, klub, kitabxana, tibb məntəqəsi və s. sosial obyektlər var idi.
Qafan rayonunun ilk azərbaycanlı ziyalılarından olan Bahadur İsmayılov bu kəndin yetirməsi olmuş, uzun illər rayon maarif şöbəsinin müdiri işləmişdir. Şabadin camaatı Azərbaycanın ərazi bütövlüyü uğrunda gedən döyüşlərdə 7 şəhid vermişdir.
Əliyev Vəzir Əli oğlu «Azərbaycan Bayrağı» ordeni ilə, Əhmədov Yaqub Ağəli oğlu «Hərbi Xidmətlərə görə» medalı ilə təltif edilmişlər, Ramazanov Firudin Bayram oğlu, Əhmədov Şirvan Məhəmməd oğlu, Mehdiyev Nurəddin İmran oğlu, Ağakişiyev Asif Xankişi oğlu, Albəndəyev Rizvan Hümbət oğlu Qarabağ uğrunda Şəhid olmuşlar.
Bu gün bütün Zəngəzura nəzarət edən Azərbaycan Ordusu yaxın gələcəkdə Şabadin kəndinin əhalisinin də öz yurd yerlərinə qayıtmasını təmin edəcəkdir. Azərbaycanın qətiyyətli Ali Baş Komandanı cənab İlham Əliyevin apardığı ardıcıl və uğurlu siyasəti bunu deməyə əsas verir.
İsa MUSAYEV
