07.11.2025, 19:18 117
- Kəlbəcər şəhər Bəhmən Cəfərov adına 1 nömrəli tam orta ümumtəhsil məktəbində “Zəfərin mübarək, Azərbaycan!” adlı tədbir təşkil olunub. Tədbirdə məktəbin pedaqoji kollektivi və şagirdləri ilə yanaşı, Kəlbəcər rayonunda Azərbaycan Respublikası Prezidentinin Xüsusi Nümayəndəliyinin, Kəlbəcər rayonunda Bərpa, Tikinti və İdarəetmə Xidmətinin, Elm və Təhsil Nazirliyinin, Daxili İşlər Nazirliyinin əməkdaşları və digər qurumların yerli nümayəndələri iştirak ediblər.
44 günlük Vətən müharibəsində qazanılmış şanlı Qələbənin beşinci ildönümünə həsr olunan tədbir Azərbaycanın Dövlət Himninin səsləndirilməsi ilə başlayıb, daha sonra şəhidlərin xatirəsi bir dəqiqəlik sükutla yad edilib.
Məktəbin direktoru Vəsilə Cəfərova çıxış edərək xalqımızın böyük Zəfərə gedən yoldan, Ali Baş Komandanın rəhbərliyi altında qazanılan Qələbənin tarixi əhəmiyyətindən və qəhrəman əsgər və zabitlərimizin misilsiz igidliyindən bəhs edib.
Tədbirdə məktəb kollektivi tərəfindən hazırlanan ədəbi-bədii kompozisiya nümayiş etdirilib, müəllimlərin ifasında “Zəfər” mahnısı səsləndirilib. (AZƏRTAC)
