20.08.2025, 15:33 250
- Laçın rayonunda Azərbaycan Respublikası Prezidentinin Xüsusi nümayəndəliyinin tərəfdaşlığı, “Ümidlə gəl” xeyriyyə layihəsi və “Inclusive Organization Company”nin birgə təşkilatçılığı ilə fiziki məhdudiyyətli şəxslərin “İnklüzivliyin sirri Laçında” adlı ilk konsert proqramı baş tutub. Layihənin əsas məqsədi əlilliyi olan şəxslərin cəmiyyətə inteqrasiyasına və inklüziv cəmiyyətin inkişafına töhfə verməkdir.
Laçın rayonunda Bərpa, Tikinti və İdarəetmə Xidmətindən verilən məlumata görə, tədbirdə rəsmi şəxslər və ictimaiyyətin tanınmış nümayəndələri iştirak ediblər.
Xüsusi nümayəndəliyin rəsmisi Albina Abduraxmanova çıxış edərək, bölgədə ilk dəfə belə bir tədbirin keçirilməsinin əhəmiyyətini vurğulayıb.
“İdeal” Sülhün Təbliği Fondunun prezidenti Sevda Əhmədova, “Ümidlə gəl” xeyriyyə layihəsinin rəhbəri Hacı Quliyev və digərləri inklüzivliyin əhəmiyyətinə dair çıxış ediblər.
Sonra fiziki məhdudiyyətli şəxslərin konsert proqramı olub. Konsert proqramında Əməkdar artist Elza Seyidcahan, ifaçı Nərmin Kərimbəyova və vokalist Rasimə Seyidcahan da çıxış ediblər.
Tədbir “Səssiz ünsiyyət” İctimai Birliyi tərəfindən işarət dili ilə tərcümə olunub.
Tanınmış rəssam Mehriban Alışovanın “Gözəllik dünyanı xilas edəcək” adlı rəsm sərgisi də nümayiş etdirilib. (AZƏRTAC)
