• Yeni sakinlər Laçına köç etdikcə, bizim qarşımızda duran vəzifələr artır.

Bunu Şərqi Zəngəzur iqtisadi rayonuna daxil olan Laçın rayonunda Azərbaycan Respublikası Prezidentinin xüsusi nümayəndəsi Məsim Məmmədov deyib.

O bildirib ki, artıq məktəb fəaliyyətə başlayıb.

“Məktəbdə 70-dən çox şagird təhsil alır. Əlavə olaraq biz gələn əhalinin məşğulluq məsələləri ilə maksimal sürətdə məşğul olmağa çalışırıq. Əgər biz istəyiriksə, şəhərdən bura nəfəs gəlsin, o zaman həmin insanlar burda yaşamaqla bərabər, çalışmalıdırlar, işləməlidirlər. Biz görürük ki, onlar da Laçının qurulmasında, bərpasında yaxından iştirak etmək istəyirlər. Bu məqsədlə biz tikinti şirkətlərində onlar üçün iş yerləri tapmağa çalışırıq”, - xüsusi nümayəndə vurğulayıb.

Məsim Məmmədovun sözlərinə görə, eyni zamanda, şəhərin yüksək hissəsindəki Zerti kəndi ərazisindəki Aqro Sənaye Parkında da işlər artıq başa çatmaq üzrədir: “Burada 40-dan çox müəssisənin yaradılması nəzərdə tutulub. Onların yarısı bu gün artıq fəaliyyətə başlayıb. Bura mebel fabriki, balıqçılıq kompleksi, heyvandarlıq sahəsi kimi müxtəlif çeşidli sahələr daxildir”.

Laçın şəhərində infrastruktur işlərinin davam etdirildiyini vurğulayan Məsim Məmmədov çoxmənzilli yaşayış binalarının tikintisinin planlaşdırıldığını da diqqətə çatdırıb: “Prezident İlham Əliyev Laçına səfəri zamanı belə bir yaşayış kompleksinin təməlini qoyub. Bundan əlavə, Laçın rayonu ərazisində bu mərhələdə qəsəbə və kəndlərin layihələndirilmə işlərini aparırıq. Gələn ilin birinci rübündə başa çatacaq. Bu iş başa çatandan sonra biz həmən qəsəbə və kəndlərin yenidənqurma işlərinə başlayacağıq. Laçın rayonu ərazisində artıq Zabux kəndinin tikintisi başa çatır. Sus kəndini isə gələn ilin yaz aylarında çalışacağıq ki, təhvil verək. Sus kəndinə 300-dən çox sakinin köçürülməsi nəzərdə tutulub.

Gələn ilin birinci yarısında Güləbird kəndinin inşasına başlanılacaq. Bundan əlavə, gələn ilin birinci yarısında Qorçu və Şəlvə kəndinin layihələndirilmə işləri başa çatacaq. Onlar da böyük qəsəbələrdir. Qorçu kəndi beynəlxalq hava limanı yaxınlığında salınacaq. Ora köçən insanlar hava limanı yaxında olduğu üçün xidmət sahəsində də çalışa biləcəklər. Beynəlxalq hava limanında da işlər sürətlə davam edir, planla 2024-cü ilin sonu, 2025-ci ilin əvvəlinə hava limanı təhvil veriləcək”. (APA)