19.04.2024, 08:00 313
- Qubadlı rayonunun Qundanlı kəndi Bərgüşad çayı sahilində, dağətəyi ərazidə yerləşir. Bu toponim Qundanlı nəslinin adı ilə bağlıdır. 1917-ci ilə qədər bu kəndin adı Qundanlı Müskanlı, Daşaltı, Əzizobası, Şərəfli olub.
Ağıllar-adlı toponim Qundanlı kəndinin şimal qərbində, dağın ətəyində yan-yana olan qədim qoyun arxaclarının adıdır. Ağıl mal-qara, qoyun-quzu yatdığı yerə deyilir.
Araqçın təpə-Qundanlı kəndi ilə üzbəüz Bərgüşad çayının o tayında təpənin adıdır. Təpə digər ərazilərdən gözəlliyi ilə seçilir. Araqçına oxşadığına görə adlandırılıb. Yerli sakinlərin dediklərinə görə, təpə heç vaxt öz yaşıllığını itirməyib.
Çömçəli-toponimi Qundanlı kəndi ərazisində böyük dərənin adıdır.
Dərbənd-adlı toponim də Qundanlı kəndinin ərazisindədir. Sözün deyilişində bir qədər dəyişiklik olmuşdur. “Dar”, “ensiz, çətin keçilən yer mənasında”, “bənd” isə kəsilmiş, daralmış mənasında işlənmişdir.
Qundanlı kəndi 1993-cü ildə Ermənistan silahlı qüvvələri tərəfindən işğal edilmişdi, erməni quldurları kəndi vandal edərək xarabalığa çevirmişlər.
Kənd 2020-ci ildə, Vətən müharibəsi zamanı düşmənə sarsıdıcı zərbə vuran rəşadətli Azərbaycan Ordusu tərəfindən işğaldan azad edilib.
Tahirə AĞAMİRZƏ
